Perezida wa Amerika Donald Trump yatangaje ko we n’umugore we Melania Trump babasanzemo coronavirus kandi ubu bagiye mu kato.
Nyakubahwa Prezida Trump w’imyaka 74 yatangaje aya makuru kuri Twitter aho yagize ati: “Ibi tuzabivamo hamwe“.
Ibi ni nyuma y’uko bamwe mu bakorana nawe bya hafi nabo babasanzemo icyorezo cya coronavirus.
Hope Hicks, umujyanama we w’imyaka 31, niwe muntu wa hafi cyane bakorana baheruka gusangamo Coronavirus.
Madamu Hicks yajyanye nawe mu ndege ya Air Force One ubwo muri iki cyumweru yari agiye mu kiganiro mpaka cyabereye muri leta ya Ohio.
Kuwa kane nijoro, Bwana Trump yari yavuze ko we n’umugore we bagiye kwishyira mu kato nyuma y’uko Madamu Hope bamusanzemo iyi ndwara.
Yari yanditse nabwo kuri Twitter ati: “Hope Hicks, umaze igihe akora cyane ataruhuka na gato, bamusanzemo Covid-19. Birakomeye!
“First Lady nanjye dutegereje ibisubizo. Hagati aho turaba dutangiye kujya mu kato!
Ntibiramenyekana neza niba kuba Bwana Trump bamusanzemo iki cyorezo bizahungabanya ikiganiro mpaka cya kabiri giteganyijwe tariki 15 z’uku kwezi i Miami muri leta ya Florida.
