USA:Ese uzi umuti Trump ari gufata ngo yirinde Covid-19?

9,411

Perezida Donald Trump wa Amerika yavuze ko amaze iminsi afata iminti ya hydroxychloroquine mu kwirinda kwandura covid-19, nubwo bwose abashinzwe ubuzima bavuga ko iyi miti ishobora kutaba myiza.

Mu kiganiro n’abanyamakuru mu biro bye, Bwana Trump yavuze ko vuba aha aribwo yatangiye iyi miti – ubusanzwe ikoreshwa mu kuvura malaria.

trump
Trump avuga umuti akoresha yirinda Covid-19

Ati: “Hashize nk’icyumweru n’igice nyifata kandi murabona ko ngihari, ndacyahari”.

  • Ibitekerezo bishya bya Trump byo kuvura Covid-19 byamaganywe
  • Abanyarwanda babujijwe gukoresha chloroquine aho itagenewe
  • Uko covid-19 yatumye imiti mpimbano yiyongera

Nta makuru yagaragajwe ko imiti ya hydroxychloroquine ishobora gukumira coronavirus nubwo ubushakashatsi bukiri gukorwa.

Gusa ibihugu bimwe na bimwe ku isi byemeje ko ariyo bikoresha mu kuvura abarwayi ba coronavirus.

Mu Rwanda, ikigo gishinzwe kwemeza ubuziranenge bw’imiti n’ibiribwa cyabujije abantu kuyikoresha mu buryo butemewe.

Ibindi Trump yavuze ni ibihe?

Trump w’imyaka 73 yabwiye abanyamakuru ati: “Mwatungurwa no kumenya umubare w’abantu bayikoresha, cyane cyane abaganga bari kuvura iki cyorezo, benshi bari kuyifata, nanjye ni uko byagenze”.

Abajijwe kwerekana ibimenyetso ko uyu muti ukora, Bwana Trump yagize ati: “Ikimenyetso cyanjye ni iki: Benshi barampamagara bambwira ibyiza byawo”.

Nubwo hari abakozi bo mu biro bye basanzemo iyi ndwara, Bwana Trump nanone yavuze ko we nta bimenyetso byayo afite kandi ayisuzumwa kenshi.

Dr Sean Conley umuganga wa perezida wa Amerika, yasohoye itangazo rivuga ko Bwana Trump “afite ubuzima bwiza” kandi “nta kimenyetso cy’uburwayi afite”.

Yongeyeho ko nyuma y’ibiganiro yagiranye na Trump ku byiza n’ingaruka zo gukoresha hydroxychloroquine, “twanzuye ko ubushobozi bwawo mu kuvura buruta ingaruka wagira”.

Havuzwe iki ku byo Trump yatangaje?

Ikigo gishinzwe ibiribwa n’imiti cya Amerika (FDA) mu kwezi gushize cyatangaje ko hydroxychloroquine “itagaragaje ko ari nziza cyangwa se ivura”.

Iki kigo kivuga amakuru y’uko uyu muti ushobora guteza ibibazo mu gutera k’umutima ku barwayi ba Covid-19.

Muri Amerika, abantu barenga miliyoni 1,5 banduye Covid-19 naho abarenga 90,000 yarabishe.

Ku byatangajwe na Trump, Madamu Nancy Pelosi ukuriye inteko ishinga amategeko (Congress) yabwiye CNN ati:

Ni perezida wacu kandi numva adakwiye gufata ikintu kitemejwe n’abahanga, cyane cyane ku myaka ye no mu buremere bwe – urebye ubyibushye bikabije, nk’uko bivugwa”.

Umwaka ushize, umuganga w’ibiro bya perezida wa Amerika yatangaje muri raporo y’umwaka ko Bwana Trump apima 110Kg n’uburebure bwa 1,90m, ibipimo byamushyiraga mu bafite umubyibuho ukabije ku kigero cya 30.4.

Leave A Reply

Your email address will not be published.