Uruhande rwa leta ya Kinshasa n’urwa AFC/M23 bongeye gushinjanya kurenga ku masezerano yo kubahiriza agahenge nyuma y’imirwano ikomeye yavuzwe muri iki cyumweru mu ntara za Kivu ya Ruguru na Kivu y’Epfo.
Mu kiganiro n’abanyamakuru ku wa kane i Goma, abakuriye M23 bavuze ko “Kinshasa idashaka amahoro” kandi ko guhera ubu “tuzajya dusubirisha igitero cyose [cyabo] ikindi”.
Patrick Muyaya, umuvigizi wa leta ya Kinshasa na we ku wa kane, ashinja M23, yabwiye abanyamakuru ati: “Tuzi urenga ku gahenge, kandi tuzi urimo kwica abantu i Goma na Bukavu”.
Ku wa kabiri no ku wa gatatu imirwano hagati y’imitwe ya Wazalendo na M23 mu duce twa Masisi na Walikale muri Kivu ya Ruguru yatumye abantu benshi bava mu byabo barahunga, nk’uko ibinyamakuru muri DR Congo bibivuga.
Imirwano yongeye kubura mu gihe mu minsi ishize mu biganiro i Doha muri Qatar intumwa za M23 na Kinshasa zumvikanye gushyiraho urwego rwo kugenzura iyubahirizwa ry’agahenge, kumvikanyweho muri Nyakanga uyu mwaka ariko katigeze kubahirizwa neza.
Ku wa kane, Corneilla Nangaa ukuriye ishami rya politike rya AFC/M23 yabwiye abanyamakuru i Goma ko Kinshasa n’abafatanya na yo “bafunze amayira yose” mu gace ka Minembwe bagateza “inzara yiyongeraho ibitero ku baturage b’abasivile”.
Nangaa ashinja Kinshasa kurenga ku masezerano atandukanye yemerewe i Doha. Ati:”Byerekana ko ubutegetsi bwa Kinshasa bukomeje intego yabwo yo kwihambira ku gisubizo kimwe cya gisirikare kuri aya makimbirane”.
Nangaa ashinja ingabo za leta ibitero by’indege byibasira ahantu hatuwe n’abasivile no guhonyora amasezerano y’agahenge, “bigakorwa mu mvugo za dipolomasi z’agakingirizo”.
Mu kiganiro n’abanyamakuru i Kinshasa ku wa kane, Patrick Muyaya yavuze ko mu masezerano ya Washington hamwe n’ibimaze kumvikanwaho i Doha byose hari intambwe zirimo guterwa.
Avuga ko nyuma y’uko impande zombi zumvikanye guhanahana imfungwa, kubahiriza agahenge n’urwego rushinzwe kubigenzura, atangazwa no kuba AFC/M23 ikomeza gushinja uruhande rwa leta guhonyora ibyo byumvikanyweho.
Asa n’usubiza ku bivugwa n’uruhande rwa M23, Muyaya yagize ati: “Intego y’ibyo bavuga ni ukuyobya abantu, Uko biri kose tuzi urenga ku gahenge, ntabwo twasubiza kuri ibyo bintu bidafite ishingiro.
Yongeraho ati: “Tuzi urenga ku gahenge, uwica [abantu] i Goma, i Bukavu. Tuzi uwica abantu i Rutshuru. Tuzi abatera ubwoba itangazamakuru.
“Twebwe turi kwibanda ku gukora ibyo uruhande rwacu rusabwa kugira ngo ibirimo kubera i Washington n’i Doha bigende neza“.
I Washington, muri iki cyumweru intumwa za Kigali na Kinshasa zongeye guhura ku nshuro ya gatatu ziganira nanone ku bigomba gukorwa mu “kurandura umutwe wa FDLR n’u Rwanda gukuraho ingamba zarwo z’ubwirinzi”.
Kinshasa ishinja Kigali kuba inyuma y’umutwe wa AFC/M23 mu gihe Kigali na yo ishinja Kinshasa gufasha umutwe wa FDLR urwanya ubutegetsi bw’u Rwanda.
Muyaya avuga ko mu biganiro hagati ya M23 na Kinshasa birimo kubera i Doha ubu barimo kuganira ku mpamvu shingiro z’amakimbirane. Ati: “i Doha dutegereje imyanzuro…. Ubu ntimukwiye guha umwanya ibindi birangaza muri kumva, kandi muzakomeza kumva.”
Comments are closed.