Ishyirahamwe Nyarwanda ry’Umukino w’Amagare (FERWACY), ryateguye Irushanwa ryo kwibuka ku nshuro ya 30 abakinnyi, abatoza, abayobozi n’abakunzi b’uyu mukino bazize Jenoside yakorewe Abatutsi mu 1994 rizaba ku cyumweru tariki ya 28 Mata 2024.
Iri siganwa ryo kwibuka ku nshuro ya 30 “Race to Remember” rizitabirwa n’amakipe asanzwe ari abanyamuryango ba FERWACY mu bagabo n’abagore ndetse atarabigize umwuga.
Muri iri siganwa abagabo bakuru ndetse n’abatarengeje imyaka 23 bazahagurukira kuri Canal Olympia berekeza Nemba basoreze kuri Canal Olympia ku ntera y’ibilometero 113.
Mu gihe mu bagore, abangavu ndetse n’abatarabigize umwuga bazahagurukira Canal Olympia berekeza Nyamata mu mujyi basoreze kuri Canal Olympia ku ntera y’ibilometero 71.8.
Nyuma yo gusiganwa abitabiriye isiganwa bazasura Urwibutso rwa Jenoside rwa Nyanza ya Kicukiro saa munani bunamire inzirakarengane ziharuhukiye.
Kugeza ubu, abanyamuryango barindwi b’Ishyirahamwe ry’Umukino w’Amagare mu Rwanda (FERWACY) barimo Sakumi Anselme wari Visi Perezida waryo, ni bo bamaze kumenyekana ko bishwe muri Jenoside yakorewe Abatutsi mu 1994.
Umwaka ushize wa 2023 mu bagabo ryegukanywe na Ngendahayo Jérémie mu gihe mu bagore ryegukanywe na Ingabire Diane.
Comments are closed.