Ishyaka riri ku butegetsi muri Angola, MPLA, ryongeye kwegukana intsinzi mu matora ya Perezida yasize João Lourenço atorewe manda ya kabiri y’imyaka itanu agiye kuyobora iki gihugu.
Ishyaka MPLA (The People’s Movement for the Liberation of Angola) rya João Lourenço, ryabonye amajwi 51,2% mu matora yabaye mu mpera z’icyumweru gishize mu gihe iryo byari bihanganye rya Unita (The National Union for the Total Independence of Angola) ryagize 44%. Unita ryari ryavuze ko ritazemera ibizava mu matora.
MPLA, rimaze imyaka hafi 50 riri ku butegetsi rinengwa ko ntacyo ryakoze ku bukene bunuma mu gihugu ndetse n’ubushomeri buvuza ubuhuha.
Umuyobozi wa Unita, Adalberto Costa Júnior mu cyumweru gishize yamaganye Ibyavuye mu matora mu buryo bw’agateganyo avuga ko ntaho bihuriye n’amajwi ishyaka rye ryabonye.
Inkuru ya BBC ivuga ko abayobozi ba MPLA bari mu byishimo ku biro bikuru byaryo mu Murwa Mukuru, Luanda mbere y’uko Perezida avuga ijambo.
Iri shyaka riri ku butegetsi kuva Angola yabona ubwigenge ikava mu maboko ya Portugal mu 1975.
Ryarwanye intambara ya gisivile na Unita yagejeje mu 2002 ariko imyaka igera kuri 20 y’agahenge nta mpinduka yigeze igeza ku baturage nk’uko byari byitezwe.
Mu batuye Angola abagera kuri kimwe cya kabiri batunzwe n’ibiri munsi y’amadolari abiri ku munsi nubwo iki gihugu gikungahaye kuri peteroli n’amabuye y’agaciro.
Lourenço yabaye perezida wa Angola mu 2017 nyuma y’aho José Eduardo dos Santos stood downwari umaze igihe kirekire ku butegetsi aviriyeho.
Urugamba yatangije rwo kurwanya ruswa rwatumye ashwana n’abo mu muryango wa Dos Santo n’abamushyigikiye ndetse bamwe byasize bashyizwe muri gereza.
Dos Santos ubwe yapfuye mu kwezi gushize aguye mu bitaro byo muri Espagne ku myaka 79 y’amavuko. Imihango yo kumushyingura yabaye ku wa Gatandatu muri Angola nubwo umukobwa we, Tchizé dos Santos, yarwanyaga ko ibera mu gihugu cye ariko urukiko rwo muri Espagne rwategetse ko umubiri we woherezwa mu gihugu cye.
Comments are closed.