Ikipe ya APR FC yamaze kumvikana na rutahizamu mushya ukomoka muri Cote d’Ivoire witwa William Togui aho byitezwe ko ayisinyira amasezerano y’imyaka ibiri.
Uyu mukinnyi yavutse tariki ya 7 Kanama mu 1996, avukira mu gace kitwa Lakota muri Cote d’Ivoire. Yatangiye gukina ruhago nk’uwabigize umwuga muri 2013 ahereye mu ikipe yitwa Espoir Koumassi. Nyuma yakiniye amakipe atandukanye arimo na Espérance Sportive de Tunis.
Ikiyamakuru “Umuryango” dukesha iyi nkuru, kivuga ko muri 2022 yerekeje muri Daring Brussels yo muri shampiyona y’icyiciro cya kabiri mu Bubiligi ku ntizanyo, ayivamo nyuma y’umwaka umwe yerekeza muri Hapoel Jerusalem Football Club yo muri Israel nabwo ku ntizanyo.
Muri 2024 yerekeje muri Beykoz Anadolu Spor Kulübü A.Ş yo muri shampiyona y’icyiciro cya kabiri muri Turukiya, ayivamo nyuma y’umwaka umwe yerekeza muri Ankara Keçiörengücü Spor Kulübü nayo yo muri iyi shampiyona ari nayo yari agikinamo kugeza ubu.
William Togui yahamagawe mu ikipe y’Igihugu ya Cote d’Ivoire bwa mbere muri 2018 aho kuva icyo gihe kugeza ubu amaze guhamagarwa inshuro eshanu gusa.
Uyu rutahizamu yamaze kumvikana na APR FC ko agomba kuyisinyira amasezerano y’imyaka ibiri ndetse amakuru avuga ko yamaze kugera i Kigali. Namara gusinya araba yiyongereye ku bandi bakinnyi bashya 7 iyi kipe y’Ingabo z’igihugu yasinyishije muri iyi mpeshyi.
Comments are closed.