Bidasubirwaho, umujyi wa Goma wamaze kujya mu maboko ya M23

Inyeshyamba za M23 zatangaje ko zafashe umujyi wa Goma, umurwa mukuru w’intara ya Kivu ya Ruguru muri Repubukika ya Demokarasi ya Congo.

Uruhande rwa leta, kugeza ku cyumweru nijoro rwari rugisaba igisirikare kurwana kuri uyu mujyi ngo ntufatwe, ntacyo ruratangaza ku bivugwa na M23.

Abatuye uyu mujyi bagiye batangaza amashusho ku mbuga nkoranyambaga berekana abarwanyi ba M23 bagenzura imihanda y’ingenzi mu mujyi wa Goma nyuma y’imirwano yabaye ku cyumweru muri uyu mujyi.

Maisha Dieudonne umuturage uvuga ko asana xza terefone mu mujyi wa Goma, yabwiye umunyamakuru wacu uri ku Gisenyi ko umujyi wose ari kuhabona abasirikare ba M23 ndetse ko abasirikare ba Leta bahunze bagatanga intwaro ku basirikare ba Loni.

Mu butumwa bwanditse ati: “Ubu hari agahenge kuva mw’ijoro ryacyeye nubwo tucyumva amasasu hato na hato”.

Ingabo za Uruguay ziri mu butumwa bwa MONUSCO zatangaje amashusho zivuga ko ari abarwanyi ba FARDC barimo gushyira intwaro hasi ku kigo cy’izi ngabo cya Rusayo mu nkengero za Goma.

Umujyi wa Goma utuwe n’abaturage bagera kuri miliyoni umaze iminsi itatu udafite amashanyarazi nk’ingaruka z’imirwano mu nkengero zawo, abawutuye benshi ubu ntibarimo kuva mu nzu zabo.

Undi muturage w’umukongomani utuye i Goma yagize ati:”Umujyi wose wafashwe, amaduka arafunze, ntituzi ikiri bukurikire”