Irushanwa rizwi nka 20Km de Bugesera Race to restore ryabaye ku nshuro ya karindwi rishobora gushyirwa ku rundi rwego rikaba ryakwitabirwa ku rwego mpuzamahanga.
Kuri iki cyumweru taliki ya 29 Kamena 2025, nibwo mu Karere ka Bugesera hashojwe irushanwa rizwi nka 20Km de Bugeser, ni irushanwa ryitabiriwe n’abasaga 105 barimo Umunyamabanga wa Leta muri Minisiteri ya Siporo Bwana Ngarambe Rwego, Guverineri w’Intara y’Iburasirazuba Bwana Pudence Rubingisa n’abandi bayobozi, bitabiriye Isiganwa ku maguru no ku magare ryahawe akazina ka “20Km de Bugesera Race to Restore”.
Iri rushanwa ribaye ku nshuro ya 7, ritegurwa n’Akarere ka Bugesera mu rwego rwo kwiyubaka, aho riba mu gihe haba hasozwa iminsi 100 yo kwibuka Jenoside yakorewe Abatutsi no kwinjira mu bihe byo Kwibohora.
Muri iri rushanwa rya ‘20Km de Bugesera Race to Restore’, abasiganwa ku maguru barushanwa ku ntera y’ibilometero 20, ibilometero 8 n’ibilometero 5.
Abasiganwa bishimisha n’abasiganwa ku magare bakina ku ntera y’ibilometero 40 mu gihe abakobwa n’abahungu n’abafite ubumuga bakoresha ibilometero 4.
Mu ijambo rye, Bwana Richard uyobora Akarere ka Bugesera yashimiye abaturage ba Bugesera, anashima abitabiriye rino rushanwa.
Umushyitsi mukuru akaba yanitabiriye rino rushanwa, ni Umunyamabanga wa Leta muri Minisiteri ya Siporo, Ngarambe Rwego, mu butumwa bwe, yashimiye Akarere ka Bugesera kateguye rino rushanwa, ndetse ashimira n’abaryitabiriye, anabizeza ubufasha bwa minisiteri akorera, ndetse ababwira ko rino rushanwa rishobora kujya ku rundi rwego rikajya ryitanirwa n’abanyamahanga, yagize ati:“Ni ukubashimira cyane kuri iki gikorwa cyiza tubasezeranya ubufasha kugira ngo turigire mpuzamahanga. Ni ukubashimira tubabwira ko turi kumwe kandi n’umwaka utaha turi kumwe”
Abenshi mu baryitabiriye, bavuze ko banyuzwe n’uburyo ryateguwe, banashimira ababiteguye ndetse basaba ko bajya batumira n’abandi bo mu tundi turere ndetse rikaba ari irushanwa rizwi ku rwego rw’igihugu, uwitwa Dativa Murekeyisoni uvuga ko afite imyaka 60 ati:”Ni ikintu cyiza, kiradusazura natwe tukumva turaruhutse mu mutwe no ku mubiri, ni irushanwa risusurutsa umujyi ku buryo usanga wacyeye cyane, gusa bazagerageze kuryagura ribe ku rwego rw’igihugu”
Abahize abandi bahawe ibihembo
Mu cyiciro cy’abasiganwa ku magare, mu bagabo, uwitwa Manirumva Elisa yegukanye umwanya wa mbere mu irushanwa ahabwa igihembo cy’ibihumbi 400 Frw, mu bagore, Mugisha Aliane ni we wahize abandi mu gutwara igare nawe ahabwa igihembo cy’ibihumbi 400 Frw.
Mu cyiciro cy’abasiganywe mu kwiruka, Bwana Muhitira Felicien niwe wahize abandi, mu gihe Niyonkuru Florence yahize abandi mu bagore, bombi bahembwa ibihumbi 400 umwe umwe.
Mu cyiciro cy’abafite ubumuga mu byiciro byombi, abahize abandi nabo bashimiwe ndetse barahembwa, ni ibihembo byatanzwe n’umuyobozi w’Akarere wungirije ushinzwe imibereho myiza y’abaturage.
(Inkuru ya HABIMANA Ramadhan, indorerwamo.com mu Bugesera)
Comments are closed.