Covid: Igerageza ry’urukingo rwa AstraZeneca muri USA ryemeje ko nta kibazo rufite

Ibipimo byari bitegerejwe byo muri Amerika ku rukiko rwa AstraZeneca byasohotse, byemeza ko uru rukingo rwizewe kandi rukora neza.

Abantu barenga 32,000 bakoreweho isuzuma, benshi muri Amerika, hamwe n’abo muri Chile na Peru.

Uru rukingo basanze 79% ruhagarika ibimenyetso bya Covid na 100% rubuza abantu kuremba cyane kubera iki cyorezo.

Basanze kandi nta mpungenge ruteza zo kwipfundika kw’amaraso nkuko bamwe mu bamaze kuruterwa bambyemezaga.

Ibihugu byinshi by’Iburayi hamwe n’ibyo muri Africa nka Africa y’Epfo, Cameroun na DR Congo byahagaritse by’agateganyo gukoresha uru rukingo.

Gusa ibihugu bimwe Iburayi byatangiye kongera kurukoresha nyuma y’uko urwego rugenzura imiti rw’Uburayi rwemeje ubuziranenge bwarwo.

Amakuru y’igerageza rishya – ryakozwe n’inzobere za kaminuza ya Columbia na kaminuza ya Rocheste n’uruganda rwa AstraZeneca – avuga ko runarinda abantu bakuze kuremba kubera Covid-19.

Hari ibihugu byinshi byari byabujije ko uru rukingo ruterwa abarengeje imyaka 65, bivuga ko nta bihamya ko rubakingira Covid-19.

Abagera kuri 1/5 cy’abakoreweho ubushakashatsi bari hejuru y’imyaka 65 – bahawe doze ebyiri, mu byumweru bine – rwarabakingiye kimwe nk’uko rwakingiye abakiri bato.

Abantu ibihumbi amagana mu Bwongereza bari guterwa AstraZeneca buri munsi, bityo ugereranyije iyi mibare yakoreweho ubushakashatsi ni mito cyane.

Ariko ibyavuyemo ni ingenzi ku kuba rwakwemezwa n’abagenzuzi muri Amerika mu gihe cy’ukwezi kumwe cyangwa abiri.

Prof Andrew Pollard wa kaminuza ya Oxford uri mu bakoze iryo genzura agira ati: “Ibyarivuyemo ni amakuru meza kuko yerekana ubuziranenge bw’uru rukingo mu bantu bandi kandi bihura n’ibyagaragajwe mbere na Oxford.

“Twiteze impinduka zikomeye mu kurwanya Covid-19 mu myaka yose y’abantu batandukanye ahari gukoreshwa uru rukingo.”

Prof Sarah Gilbert, uri mu bakoze uru rukingo, agira ati: “Mu bihugu byinshi no mu myaka inyuranye y’abantu, uru rukingo rurinda abantu Covid-19, kandi twizeye ko ibi bizatuma rurushaho gutangwa henshi mu muhate wo kurandura iki cyorezo ku isi”.

Prof Gilbert avuga ko buri gihe habaho abantu barwara nyuma yo guterwa inkingo, cyane cyane iyo hari abantu benshi barutewe, ariko ngo ibyo ntibivuze ko buri gihe ibibazo baba babitewe n’inkingo.

Hagati aho Iburayi, abantu ibihumbi baracyicwa na Covid-19 buri munsi.

Madamu Sarah Gilbert ati: “Ni ingenzi cyane ko turinda abantu vuba bishoboka. Uru rukingo ruzakiza ubuzima.”

(Inkuru ya BBC)