Bruce Melodie yavuze ko amagambo Yampano yamuvuzeho mu minsi ishize, agaragaza ko bataziranye abantu badakwiriye kuyakuririza kuko hari impamvu yabivuze kandi ashobora kuba ari mu kuri.
Uyu muhanzi yabigarutseho mu kiganiro yagiranye na B&B Kigali FM, mu biganiro by’uruhererekane iyi radiyo imaze iminsi ikora igaruka ku buzima bw’ibyamamare bitandukanye.
Bruce Melodie abajijwe ku bwumvikane buke bumaze igihe bugaragara mu bahanzi, yavuze ko ari ibintu bisanzwe ko abahanzi batakumva ibintu kimwe, bityo ko ayo magambo adakwiriye guca igikuba.
Ati:“Birasanzwe mu bahanzi kutumvikana…ntabwo ari ibyo gushyigikira. Nabonye abantu bari kuvuga ku muhanzi Yampano, baramumbajije avuga ko atanzi mbona abantu barabikuririje.”
“Ntihazagire umuntu n’umwe utera Yampano ibuye, ashobora kuba ari ko abibona mu gihe agezemo kubera ko ubunararibonye afite ari buke cyangwa se abibona nk’ukuri. Ntibizatume abafana banjye batajya kumva imiziki ye.”
Uyu muhanzi avuga ko ibyo Yampano yakwigira byose, urugendo arimo rwo kuzamuka mu muziki n’abandi barunyuzemo kandi ruba rutoroshye.
Ati:“Ahantu Yampano ashobora kunyura byanga bikunze narahakandagiye. Ndabizi ibyo ari byo n’uko biba byagenze. Ikintu cya mbere kigoye ni ukuba muri uru ruganda bikaba amarangamutima yawe. Ntimutere amabuye Yampano kuko ibyo yavuze ni ko abyumva cyangwa ni bwo buryo yabonye yakoresha.”
Yahamije ko nta rwango yagiriye uyu muhanzi ku buryo yamukumira bibaye ngombwa ko abona ikiraka cyo kuririmba muri Kigali Universe yatangijwe na 1: 55 AM imureberera inyungu, avuga ko atari igifura kuri urwo rwego, asaba abakunzi be kumva ibihangano by’uyu musore.
Ati:“Umuziki n’umwana wanjye yawukora. Si ahantu ho gukinira ‘sinabyaye’. Icya kabiri kuba abantu babivugaho ni kimwe, kubitiza umurindi ni ikindi. Niba utekereza ko usesengura ibintu bijyanye n’umuziki nakureba nkabona nta na kimwe ubyumvaho, uri mu kazi katakubereye uzabikoreramo amakosa cyangwa ibyaha.”
Umuririmbyi Uworizagwira Florien umaze kumenyekana nka Yampano aherutse kuvuga ko nta kintu yavuga kuri Bruce Melodie kuko atamuzi, agaragaza ko n’ikimenyimenyi nta hantu barahurira.
Uyu muhanzi yabigarutseho mu kiganiro yagiranye na Televiziyo y’u Rwanda, aho yari ari kuvuga ku buryo yatumiwe kuririmba mu gitaramo The Ben yakoreye muri BK Arena.
Umunyamakuru yari amubajije icyo yavuga kuri Bruce Melodie wari umaze iminsi avugwaho kudacana uwaka na The Ben, akaza kugaragara mu gitaramo cye.
Undi mu gusubiza yagize ati “Bruce nta kintu mfite cyo kumuvugaho. Abagabo ba 1:55 AM, ntacyo nabavugaho. Ntabwo muzi Melodie, ntabwo turahura. Nta kintu muvugaho.”
Hari amakuru avuga ko Yampano yasabye Melodie ko basubiranamo indirimbo undi akabyanga kubera akazi kenshi yari afite, bikaza kuvamo kumwitwaramo umwikomo.
Melodie muri iki kiganiro yagiranye na B&B yanagarutse kuri Yago wamwibasiye mu minsi yashize, avuga ko abantu badakwiriye kwiriza mu ruganda rw’umuziki cyane ko nta muntu warubazanyemo.
Ati:“Ni ibyiyumviro. Umuntu areba ibyo yagufashije akirengagiza ibyo wakoze. Yago ibintu yaje kubishyira ku rwego ntakekaga. Mbona bisa nabi cyane mfata umwanzuro wo kwicecekera.”
“Ntabwo Yampano yakabije, kandi ibyo yavuze ni ibisanzwe bitabambisha umuntu. Ariko Yago we ntabwo ikibazo ari uko yagiranye nanjye ikibazo, yakigiranye n’abantu bose. Akwiriye kwisuzuma akavuga ati ‘ko muntu wumvikana ubwo nibo kibazo cyangwa ikibazo ni njye?’.”
Uyu muhanzi yasabye Minisitiri w’Urubyiruko n’Iterambere ry’Ubuhanzi, Dr. Utumatwishima Jean Nepo Abdallah, gutunga itoroshi mu myidagaduro, akareba uko itangazamakuru ryitwara ndetse n’abandi baririmo bashobora gukuririza ibintu bikarenga umuziki bikagera mu nzangano zakurura ibindi.
Comments are closed.