Amatike y’umukino uzahuza ikipe ya Rayon Sports na APR FC ari kugana ku musozo aho ushobora gusigira iyi kipe yavukiye i Nyanza agera kuri Miliyoni 200 Frw.
Ni wo mukino wa mbere wishyujwe hose ugiye kuzuza Stade Amahoro nshya nyuma yo gutahwa ku mugaragaro itanzwe n’Umukuru w’Igihugu Perezida Paul Kagame, ikaze kwemezwa na FIFA na CAF nka Stade iri ku rwego rwa mbere haba muri Afurika no ku Isi.
Ikipe ya Rayon Sports yashyize ku isoko amatike yo mu byiciro bitanu, Regular Upper na Regular Lower bakunze kwita ahandi hose hasigaye yagurwaga. Ahurwa ibihumbi bitatu, VIP ni ibihumbi 20 Frw, VVIP, ibihumbi 50 Frw, Executive Seat z’ibihumbi 100 Frw ndetse na Sky Box za Miliyoni.
Rayon Sports yatangaje ko amatike yandi yose yashize, uretse igice cyo hejuru cya Regular Upper ari na cyo gifite imyanya myinshi muri Stade Amahoro nshya, gusa na cyo bikaba byitezwe ko bigera ku wa Gatanu amatike yose yaguzwe.
Imyanya yo hasi hasi izwi nka Regular Lower ingana na 17 424 naho iyo hejuru izwi nka Regular Upper ni 26 050 bivuze ko aho hombi hafite amatike 43.474 ahwanye na 130.422.000 Frw.
Imyanya ya VIP muri Stade Amahoro nshya itanga amatike 953 aho imwe yagurwaga 20 000 Frw bivuze ko yose hamwe yatanze 19.060.000 Frw. Amakuru IGIHE ifite ni uko Rayon Sports iteganya gutumira abagera ku 100 muri iki cyiciro bivuze ko hazasigara 17.060 .000 Frw.
VVIP isanganywe imyanya 347 aho itike yari ibihumbi 50 Frw bivuze ko yatanze agera 17.350.000 Frw. Aha ariko na ho Rayon Sports yatanze ubutumire 10 bivuze ko hasigara 16.850.000 Frw.
Sky Box zo ni umunani kuri Miliyoni imwe zikaba zaratanze agera kuri Miliyoni umunani mu gihe Executive Seats 12 ku bihumbi 100 Frw imwe zatanze agera kuri 1 200 000 Frw.
Aya mafaranga yose angana na 173 500 000 Frw ari na yo nta gihindutse Rayon Sports izakura mu matike y’umukino.
Iyi yanashatse abandi baterankunga b’uyu mukino barimo SK, OL na Forzza bazamamaza muri Stade Amahoro aho amakuru avuga ko batanze agera kuri 15.000.000 Frw.
Ayo mafaranga aziyongeraho agera kuri Miliyoni eshanu yatanzwe n’abazaba bacuruza ibiribwa n’ibyo kunywa mu duce dutandukanye muri Stade Amahoro.
Muri rusange, Rayon Sports ishobora kwandika amateka yo kwinjiza amafaranga menshi kuri Stade, aho umukino wa APR FC uzasiga agera kuri miliyoni 193 Frw.
Muri siporo y’u Rwanda, igikorwa cya siporo cyinjije amafaranga menshi kugeza ubu ni Rayon Sports Day yo mu 2024 aho yinjije miliyoni 72,5 Frw mu gihe umukino Rayon Sports yatsinzemo APR FC mu 2019 winjije miliyoni 68,5 Frw.
(Src:Igihe)
Comments are closed.