Mu Majyaruguru y’u Buhinde, abantu 30 bapfuye, abandi 90 barakomereka mu muvundo wabaye ubwo imbaga y’abantu benshi bari mu rugendo-nyobokamana (pèlerinage) rwitwa ‘Kumbh Mela’, rujyana no kwiroha mu mazi y’ahahurira imigezi mitagatifu, yoza ibyaha nk’uko biri mu myizerere y’idini ya Hindu babyiganaga, bamwe bakagwa bagakandagirwa, nk’uko byatangajwe n’uhagarariye Polisi mu gace ka Prayagraj, aho iyo mpanuka yabereye witwa Vaibhav Krishna.
Ikinyamakuru NBCNews cyatangaje ko ku wa Gatatu tariki 28 Mutarama 2025, ari bwo umuganga utarashatse gutangaza amazina ye, yavuze ko hari abantu 15 bapfuye baguye mu muvundo ndetse abandi benshi bakaba bakomeretse, harimo n’abakomeretse bikomeye aho muri uwo Mujyi wa Prayagraj. Ariko uyu munsi imibare yakomeje kuzamuka y’abaguye muri uwo muvundo.
Ni urugendo rutegurwa buri myaka 12, rukamara ibyumweru 6 rubera aho i Prayagraj, rukitabirwa n’abizera bo mu idini ya Hindu babarirwa muri za Miliyoni baturutse hirya no hino mu Buhinde, ariko n’abaturutse mu mahanga, aho baba bafite intego yo kugera mu mazi y’umugisha ari ahantu hahurira imigezi mitagatifu ya Gange na Yamuna.
Bamwe muri abo bari baje muri urwo rugendo, batangaje ko impanuka yabaye mu masaha y’ijoro, ubwo imbaga y’abantu yari yerekeje aho iyo migezi ihurira kugira ngo birohemo bwa mbere muri urwo rugendo rwa 2025, bigatuma haba umuvundo ukabije.
Uwitwa Renu Dei w’imyaka 48 y’amavuko, wari muri urwo rugendo yagize ati “Nari ndi hafi y’aho abantu bamanukira bajya mu mazi, maze bose bangwa hejuru, mu gihe imbaga nini yarimo imanuka ijya mu mazi. Mu gihe abantu bari bamanutse ari igihiriri, abageze mu zabukuru ndetse n’abagore, babuze umuntu uza kubafasha”.
Urwo rugendo-nyobokamana ngo rukunze kugwamo abantu mu gihe rwabaye, kuko rwitabirwa n’abantu benshi cyane, bitewe ahanini n’uko icyo guhugu gituwe n’abantu benshi kandi abenshi bakaba ari abo mu idini ya Hindu itegura urwo rugendo.
Pancham Lodhi wari utegereje kwakira umurambo w’umukazana we, mu bitaro byubatswe mu mahema aho urwo rugendo rubera, yagize ati “Twari tugiye koga mu mazi, noneho abantu batangira gusunikana, birangira bamwe baguye, abandi bakajya babakandagirira hasi”.
Bamwe muri abo baje mu rugendo, ndetse n’abashinzwe ubutabazi, bahise batangira gutabara abari baguye hasi, mu myenda myinshi n’intweto byatawe n’abo bantu barimo biruka kubera ubwoba bwo gutinya ko babagwaho.
Minisitri w’Intebe w’u Buhinde, Narendra Modi, yatanze ubutumwa bwo kwifatanya mu kababaro n’abahuye n’iyo mpanuka, ndetse n’imiryango yabuze ababo.
Rahul Gandhi, utavuga rumwe n’ubutegetsi mu Buhinde, we yahise atangaza ko iyo mpanuka yatewe ahanini n’uburangare bw’abategetsi b’u Buhinde, badacunga umutekano neza w’ahabera urwo rugendo nyobokamana.
Si ubwa mbere urwo rugendo rugwamo abantu, kuko mu 1954, ngo hapfuye abantu 400 mu munsi umwe, bamwe bakandagiwe mu muvundo w’abantu benshi, abandi barohama muri ayo mazi bivugwa ko yoza ibyaha by’abizera bayagiyemo.
Mu rugendo nk’urwo rwaherukaga gukorwa mu 2013, nabwo hapfuye abantu bagera kuri 36 baguye mu muvundo. Urwo rugendo rwo muri uyu mwaka wa 2025, biteganyijwe ko ruzarangira ku itariki 26 Gashyantare 2025.
Ubuyobozi bukaba bwatangaje ko rwitabiriwe n’abantu bagera kuri Miliyoni 400, mu gihe urwarubanjirije mu 2013, rwari rwitwabiriwe n’abagera kuri Miliyoni 120.
Comments are closed.