Kigali: Abakozi ba ASA International bakoze umuganda rusange, batera ibiti bisaga 700 (Amafoto)

Abakozi b’ikigo cy’imari cya ASA International bifatanije n’abaturage bo mu Murenge wa Gatenga mu muganda rusange batera ibiti birenga 700.

Nk’ibisanzwe mu Rwanda, buri wa gatandatu wa nyuma y’ukwezi haba hateganijwe umuganda rusange w’abaturage, aho abaturage bahurira mu duce tuba twateganijwe n’inzego zibakuriye bagakora ibikorwa by’isuku, cyangwa bimwe mu bikorwa bidasanzwe by’inyungu rusange, umuganda ni igikorwa kimaze igihe kitari gito mu Rwanda kandi kimaze kumenyerwa n’abaturage.

Ni muri urwo rwego kuri uyu wa gatandatu usoza ukwezi k’Ugushyingo 2025, abayobozi n’abakozi b’ikigo cy’imali cyitwa ASA INTERNATIONAL gisanzwe gitanga serivisi z’imari zitandukanye bafatanije umuganda n’abaturage bo mu mujyi wa Kigali, mu murenge wa Gatenga, mu Kagali ka Nyarurama ahazwi nko mu Bisambu, aho aba bakozi ba ASA International bari barangajwe imbere n’umuyobozi mukuru wabo Bwana Christian SALIFU bateye ibiti bisaga 700.

Muri iki gikorwa cyitabiriwe n’abaturage batari bake, Umuyobozi w’umurenge wa Gatenga Bwana MUGISHA Emmanuel, yashimiye abakozi ba ASA International baje kwifatanya nabo mu muganda n’inkunga y’ibiti bahaye abaturage b’akagali ka Nyarurama, asaba abaturage kubibungabunga bitazicwa n’izuba, yagize ati:”Turashimira abashyitsi baje baturutse muri ASA INTERNATIONAL bayobowe n’umuyobozi mukuru wabo, bateye inkunga ikomeye Umurenge wacu by’umwihariko abaturage bo mu kagali ka Nyarurama, ni inkunga irama, ndashimira na none abaturage bitabiriye umuganda, ariko nkanabasaba kubungabunga bino biti duhawe, bameze nk’abaduhaye ku buzima, akamaro k’ibiti mu buzima bwacu ntigashidikanywaho, ibiti biduha umwuka mwiza duhumeka, gutera ibiti n’amashyamba biri muri hagunda za Leta“

Uyu mugabo yongeye yibutsa abaturage ko byibuze umuturage umwe agomba kuba afite 6 mu rugo rwe, kandi ko ibyo biri mu nyungu ze n’iz’igihugu mujri rusange, ati:”Nabibutsaga ko buri muturage yakagombye kuba afite mu rugo rwe ibiti byibuze 6 harimo n’iby’imbuto aho kuzuza za pavés n’amabuye mu gipangu, ibiti bituma duhumeka neza, ndetse hari n’abaturuka mu bihugu byo hanze na bamwe muri ba ambasaderi baza gufata ku mahumbezi y’ibiti byacu mu Rwanda, rero turabashimye kuko ibyo mugiye kubishyira mu bikorwa”

Mu ijambo rye, Bwana Christian SALIFU, umuyobozi mukuru wa ASA INTERNATIONAL, yashimiye abaturage bo mu mudugudu wa Bisambu ku muganda bakoranye, anashimira abayobozi b’inzego z’ibanze babakiriye, nawe akomoza ku kamaro ko gutera ibiti n’amashyamba, anasaba ko ibyo biti byabungabungwa, ndetse ko bidakwiye kugarukira ku gutera ibiti gusa, ko ahubwo hakwiye kubaho igikorwa cyo kujya bakurikirana ibyo biti uko bikura, ati:”Ndashimiye abaturage bo mu murenge wa Gatenga, by’umwihariko abo mu kagali ka Nyarurama, twakoranye umuganda mwiza kandi byatunejeje, ndashimira n’abayobozi batwakiriye bose. Ariko rero nk’uko Umuyobozi w’Umurenge yabivuze, ibiti ni ingirakamaro ku mibereho yacu, ni ngombwa kujya tugira uwo muco wo gutera ibiti, ariko rero ntibikwiye kugarukira ku gikorwa cyo gutera gusa, ahubwo hagomba kubaho n’uburyo bwo gukurikirana bya biti byatewe, tukareba niba bikura neza cyangwa bitarumye, icyo kintu tuzagerageza kugikoraho“

Ikigo cy’imari cya ASA INERNATIONAL gifite icyicaro gikuru mu murenge wa Gisozi, ni ikigo kimaze imyaka itari mike mu Rwanda, kikaba gikorera mu gihugu hose aho gifite amashami agera kuri 37 yose hirya no hino mu gihugu ndetse kikaba gitanga inguzanyo ku bacuruzi bashaka kuzamura ibikorwa byabo, kikanabafasha kwizigamira.

Bwana SALIFU Christian utari wifuje kuvanga igikorwa cy’umuganda n’iyamamazabikorwa rya ASA International, ariko akaza kubisabwa n’umunyamabanga nshingwabikorwa w’Umurenge wamusabye kubwira abaturage serivisi batanga, yavuze ko inguzanyo batanga zishobora kugera no kuri miliyoni nta ngwate, ndetse ko iyo umukiliya yishyuye neza ayo yahawe, aba afite uburenganzira bwo kuba yasaba n’inguzanyo igera kuri miliyoni eshanu zose kandi ku nyungu nto cyane.

Si ibyo gusa kuko ASA INTERNATIONAL ivuga ko itanga n’inguzanyo ya moto ku bamotari bifuza gutunga moto zabo, Bwana Christian yagize ati:”Usibye n’ibyo, tunatanga inguzanyo ya moto ku bamotari bibyifuza, hari ikigo dufitanye amasezerano aho umumotari tumugurira moto akajya ayishyura gake gake kugeza ibaye iye” Ni ikintu cyanyuze bamwe mu bamotari bari bitabiriye umuganda, ku buryo bahise bacinya akadiho na SALIFU uyobora ASA INTERNATIONAL

Umwe mu bakora umwuga w’ubumotari waganiriye n’umunyamakuru wa Indorerwamo.com yagize ati:”Sijye uzabona kuwa mbere harageze ngo ntangire gusaba moto, ndambiwe agatunambwene k’aba boss udashobora kubwira ko wabuze verisoma kubera imvura, ubu nzagenda nyisabe nanjye, kandi nzayishyura neza nyimaremo”

Si abo gusa, n’abacuruzi bo mu gasoko ka Bisambu bavuye aho bavuga ko bagiye kugana icyo kigo cy’imari cyemera kubaguriza amafaranga bakazamura ubucuruzi bwabo kandi badatanze ingwate, uyu witwa Ukwishatse Madeleine yagize ati:”Niba koko bayatanga, natwe tugiye kuza bayaduhe dukore kandi twiteze imbere, ahubwo batubwire aho bakorera“, Akibaza aho bakorera, Umuyobozi wa ASA INTERNATIONAL yahise yereka abaturage abayobozi b’ishami ryo mu Karere ka Kicukiro, batanga numero zabo, ndetse bahigira kugana icyo kigo cy’imari bivugwa ko gikomeje kuvana abatari bake mu bukene.

Mu gusoza ijambo rye, umuyobozi w’umurenge wa Gatenga Bwana MUGISHA Emmanuel, yasabye abaturage kujya batinyuka kugana ibigo by’imali bagafata amafaranga make make yabateza imbere, ati:”Uzasigara mu bukene si uwanjye, dore mbarangiye ikigo cy’imali, mwumvise n’ibyo umuyobozi mukuru wacyo abibwiriye, mubagane rero babahe amafaranga mwiteze imbere mujejete inoti“