Minisiteri y’Ubuzima yatangaje ko kuri uyu wa Kabiri tariki ya 28 Mata 2020 mu Rwanda habonetse abantu 5 bashya bagaragaweho ubwandu bwa Covid-19mu bipimo 1,505 byafashwe. Ni ukuvuga ko abamaze kwandura iyo ndwara mu Rwanda ari 212. Abantu bakize uyu munsi ni 2 bituma abamaze gukira muri rusange baba 95. Abakirwaye ni 117.
Ugereranyije n’uko byagenze mu minsi 4 iheruka,uyu munsi ubwandu bwagabanutse kuko habonetse abantu 5.Kuwa 5 habonetse abantu 22,kuwa Gatandatu haboneka 7 Ku cyumweru habonetse 8 mu gihe kuwa mbere habonetse 16.
Minisiter y’ubuzima yavuze ko ubwandu bwiyongereye cyane muri iyi minsi bwaturutse ku batwara amakamyo yambukiranya imipaka n’abo bakorana bapimwe bagasanga baranduzanyije.
Abarwayi bose bari kuvurirwa ahabugenewe kandi bari koroherwa nkuko byatangajwe na Minisiteri y’ubuzima.
Minisiteri y’Ubuzima irasaba abaturarwanda gukurikiza amabwiriza y’ubuzima yashyizweho hitabwa cyane cyane ku gukaraba intoki kenshi no kuguma mu rugo.
Udupfukamunwa tugomba kwambarwa iyo abantu bavuye mu rugo ndetse niyo bahuye n’abantu benshi,nko mu nsisiro n’ahatuye abantu benshi.
Minisiteri y’Ubuzima ikomeje kwihanangiriza buri wese, isaba kubahiriza amabwiriza yo kwirinda, kudahisha cyangwa kwirinda kwanga gutanga amakuru no guhisha ibimenyetso bya COVID-19, kuko ari ugushyira ubuzima bw’abandi mu kaga ndetse uzafatwa yakoze ibyo azahanwa n’amategeko.
Ibimenyetso by’ingenzi bya Coronavirus birimo Inkorora,guhumeka bigoranye n’umuriro.Umuntu wese ashobora kwipimisha Coronavirus akoresheje telefoni akanda *114#,maze agakurikiza amabwiriza cyangwa agahamagara umujyanama w’ubuzima umwegereye.Telefoni itishyurwa ni 114,Whatsapp +250788202080.Email ni :callcenter@rbc.gov.rw.
Ku isi yose,abamaze kwandura Covid-19 ku Isi bagera kuri 3, 065, 176, ni mu gihe abamaze gupfa ari 211 636.
Leta Zunze Ubumwe za Amerika nizo zikomeje kuza imbere mu bimaze kugira umubare w’abanduye n’abishwe na Covid-19 ku Isi kuko abanduye ni 1 010 507, barimo 56 803 bamaze gupfa. Espagne iraza ku mwanya wa kabiri kuko handuye abantu 229 422 hamaze gupfa 23 521, mu Butaliyani handuye 199 414 hamaze gupfa 26 977, mu Bufaransa handuye 165 842 hamaze gupfa 23 293.
Mu Budage handuye abantu 158 758 hapfuye 6 126, naho mu Bwongereza handuye abantu 157 149 abamaze gupfa ni 21 092.
Ku mugabane wa Afurika wose hamaze kugaragara abantu barenga 34 047 banduye Coronavirus, abamaze gupfa ni abantu 1 472 naho abakize ni 10 575.
Comments are closed.