Nyanza: Hari abanyonzi bavuga ko babangamiwe n’abajura babatega bakabambura amagare yabo

By Ubwanditsi Last updated Jan 27, 2025

Abakora umwuga wo gutwara abantu ku magare mu mujyi wa Nyanza, baravuga ko bamaze igihe bategwa n’insoresore zikabambura amagare yabo.

Bamwe mu bakora umwuga wo gutwara abantu ku magare bazwi nk’abanyonzi bakorera mu mujyi wa Nyanza baravuga ko bamaze iminsi bibasirwa n’insoresore zibategera mu nkengero z’umujyi maze zikabambura amagare yabo.

Uwitwa Hategeka avuga ko izo nsoresore zibategera mu nkengero z’umujyi, ndetse ko hari abanyonzi bagera kuri babiri bamaze kwamburwa amagare yabo, yagize ati:”Hari abanyonzi babiri baherutse kwamburwa amagare yabo, ni abasore b’ibigango baba bafite ibyuma“

Uyu mugabo avuga ko abo basore bitambika mu muhanda maze wahagarara bagasohora ibyuma bakakwambura igare n’umuzigo w’umugenzi uba utwaye, ati:”Barakwitambika wahagarara bakakwambura igare n’ibyo uhetse”

Si abanyonzi gusa bataka buno bugizi bwa nabi kuko hari n’abatwara za moto bavuga ko bategwa n’insoresore zikabambura, uyu yagize aati:”Narabyumvise, bakunze gukorera hakurya ku Rwesero mu gashyamba, nanjye baherutse kuntega ariko kubera ko nari maze kubyumva nanze guhagarara bahita bava mu nzira”

Twashatse kumenya niba icyo kibazo kizwi n’ubuyobozi bw’Akarere ariko ntibyadukundira, gusa umwe mu bashinzwe umutekano ku rwego rw’Akarere mu bazwi nka DASSO ariko akaba atashatse ko amazina ye ajya mu itangazamakuru, yavuze ko aya makuru bamaze iminsi bayumvise ndetse ko uduce twose bategeramo tumaze kumenyekana hasigaye gusa ko bohereza abashinzwe umutekano maze abo bagizi ba nabi bagafatwa, yagize ati:”Sijye utanga amakuru y’Akarere, ariko icyo kibazo kirazwi, bategera mu bice byo mu Gihisi, ku cyuzi cya Nyamagana, hariya ku rupango, ndetse no ku Bigega ugana i Mugandamure, bikinga umwijima bakambura amagare abanyonzi, gusa mu minsi mike kirakemuka“

Mu Karere ka Nyanza higeze kuvugwa agaco k’amabandi kari kariyise Abazuke, ayo mabandi yarahagurkiwe ararwanywa ndetse abaturage bagira umutekano useseuye.

Abantu benshi bavuga ko ubukene bwiganje mu rubyiruko rwo muri ako Karere ka Nyanza yaba ari imwe mu mpamvu zituma uburara n’ubusarigoma bukunze kuvugwa muri uwo mujyi.