Imikino y’Umunsi wa Gatatu wa UEFA Champions League yaranzwe n’iibitego byinshi, aho mu mikino icyenda yakinwe ku wa Gatatu, tariki ya 22 Ukwakira 2025, yarangiye habonetse ibitego 27.
Umukino wari utegerejwe cyane ni uwahuje Real Madrid na Juventus, aho igitego rukumbi cyinjijwe na Jude Bellingham waheruka kubona izamu muri Kamena, cyahesheje iyi kipe yo muri Espagne gutsindira kuri Santiago Bernabéu 1-0.
Ni igitego cyabonetse ku munota wa 58 ubwo Vinícius Jr yacengaga abakinnyi batatu, agatera ishoti ryasubijwe inyuma n’igiti cy’izamu, umupira usanga Bellingham wahise awuboneza mu izamu.
Juventus iheruka intsinzi ku wa 13 Nzeri ndetse kuri ubu yujuje imikino irindwi idatsinda mu marushanwa yose. Muri Champions League, yabonye amanota abiri mu mikino itatu mu gihe Real Madrid ifite amanota icyenda.
Iyi kipe yo mu Butaliyani yari yagerageje kurema uburyo butandukanye mu mukino, ariko igorwa n’umunyezamu Thibaut Courtois wakuyemo imipira irimo ishoti ryatewe na Filip Kostić.
Indi mikino yabaye ku wa Gatatu, Liverpool yari imaze imikino ine idatsinda, yongeye kubona intsinzi ubwo yanyagiraga Eintracht Frankfurt ibitego 5-1.
Rasmus Kristensen yari yafunguye amazamu ku ruhande rwa Eintracht Frankfurt yari mu rugo ku munota wa 26, ariko Liverpool yishyura nyuma y’iminota icyenda ibifashijwemo Hugo Ekitike wahuraga n’ikipe yakiniye.
Virgil Van Dijk na Ibrahima Konaté batsinze kuri koruneri mbere y’uko igice cya mbere kirangira, Cody Gakpo atsinda igitego cya kane ku mupira wavuye kuri Florian Wirtz wanatanze undi wavuyemo igitego cya Dominik Szoboszlai mu gice cya kabiri.
Chelsea yatsinze Ajax yahawe ikarita itukura ibitego 5-1 naho Bayern Munich inyagira Club Brugge ibitego 4-0.
Nyuma y’imikino itatu imaze gukinwa, amakipe atanu afite amanota yose ni Paris Saint-Germain, Bayern Munich, Inter de Milan, Arsenal na Real Madrid.
Ni mu gihe Benfica na Ajax zitarabona inota naho Villarreal, FC Copenhagen, Olympiacos na Kairat zifite inota rimwe.
Uko imikino yose yabaye ku wa Gatatu yarangiye:
- Athletic Club 3-1 Qarabag
- Galatasaray 3-1 Bodø/Glimt
- Atalanta 0-0 Slavia Prague
- Bayern Munich 4-0 Club Brugge
- Chelsea 5-1 Ajax
- Eintracht Frankfurt 1-5 Liverpool
- AS Monaco 0-0 Tottenham
- Real Madrid 1-0 Juventus
- Sporting CP 1-1 Marseille
Comments are closed.