Abantu babiri bapfuye abandi barenga icumi barakomereka mu iraswa ryabereye mu busitani bw’ahantu bafatira icyo kunywa i Austin, muri Texas, mu gihe FBI ivuga ko bishobora kuba bifitanye isano n’iterabwoba.
Polisi ya Austin yatangaje ko ukekwaho icyaha ari Ndiaga Diagne w’imyaka 53. Yari Umunyamerika ukomoka muri Senegal wahawe ubwenegihugu, nk’uko bitangazwa n’umufatanyabikorwa wa BBC muri Amerika CBS News ndetse n’ibindi bitangazamakuru byo muri Amerika.
Ku Cyumweru, nyuma yo kwitaba telefone ivuga ko hari umuntu urimo kurasa mu masaha ya saa munani z’urukerera (08:00 GMT) hafi y’akabari ka Buford mu murwa mukuru wa leta yo mu majyepfo ya Amerika, abapolisi bavuze ko barashe bakica ukekwaho icyaha, bituma abapfuye bagera kuri batatu.
Polisi ntabwo yatanze impamvu yateye ukekwa gukora ubu bwicanyi. Mu barokotse, 14 bajyanywe mu bitaro, batatu bameze nabi.
Amasoko y’amakuru abiri yegereye iperereza yatangarije CBS News ko umuntu witwaje imbunda yari yambaye umupira w’imbeho wanditseho amagambo “Umutungo wa Allah”.
CBS yabwiwe kandi n’umuyobozi ufite ubumenyi ku iperereza ko abapolisi basatse inzu y’uyu muntu wari witwaje imbunda bahasanga ibendera rya Iran n’amafoto y’abayobozi ba Iran.
Iki gitero kibaye kuri iki Cyumweru gishize nyuma y’uko Amerika n’inshuti yayo Israel batangije ibitero kuri Iran, byahise bihitana Umuyobozi w’Ikirenga wa Iran, Ayatollah Ali Khamenei, ku ikubitiro.
Comments are closed.