Trump arateganya guhura na Xi Jinping imbona nkubone

Perezida wa Leta Zunze Ubumwe za Amerika Donald Trump azahura na mugenzi we w’u Bushinwa Xi Jinping muri Koreya y’Epfo ku wa 30 Ukwakira, mu nama y’abakuru b’ibihugu byo muri Aziya, nk’uko White House yabitangaje.

Umuteguro wo guhura kwa Xi na Trump wari umaze igihe ukorwa, mu gihe umwuka mubi hagati y’ibi bihugu byombi bifite ubukungu bunini ku isi ukomeje kwiyongera.

Iyi ni yo nama ya mbere y’imbona nkubone hagati y’aba bayobozi bombi kuva Trump agarutse ku butegetsi.

Trump yateye ubwoba ko azashyiraho umusoro wiyongereyeho 100% ku bicuruzwa biturutse mu Bushinwa guhera muri Ugushyingo, niba Ubushinwa butakuyeho inzitizi zabwo ku byoherezwa mu mahanga by’imiti n’imyanda y’agaciro.

Ubushinwa ni bwo buyoboye ku isi mu gukora imiti n’ibikoresho by’agaciro bikoreshwa cyane mu modoka, telefone n’ibindi byinshi.

Mu kiganiro n’abanyamakuru ku wa Kane, umuvugizi wa White House Karoline Leavitt yemeje ko iyo nama hagati y’aba bayobozi bombi izaba.

Iyo nama izabera ku ruhande rw’Inama y’Ubufatanye mu Bukungu bwa Aziya na Pasifika (APEC), izabera i Gyeongju, Koreya y’Epfo, kuva ku wa 31 Ukwakira kugeza ku wa 1 Ugushyingo uyu mwaka.

“Nzahura na Perezida Xi w’u Bushinwa. Dushobora gukemura amakimbirane n’ibibazo byinshi dufite hamwe,”:ni ko Trump yavuze.

Trump kandi biteganyijwe ko azahura na Perezida wa Koreya y’Epfo Lee Jae Myung mu rugendo rwe muri icyo gihugu, ndetse anitabire ifunguro rya nimugoroba hamwe n’abayobozi.

Azanahura n’abayobozi bo muri Maleziya, Koreya y’Epfo na Japani cyane cyane Minisitiri w’Intebe mushya wa Japani, Sanae Takaichi, nk’uko umuvugizi wa White House yabitangaje.

Trump na Xi bamaze kuganira inshuro zigera kuri eshatu muri uyu mwaka, iya vuba ikaba yari muri Nzeri, aho baganiriye ku masezerano ajyanye n’imikorere ya TikTok muri Leta Zunze Ubumwe za Amerika.

Trump yavuze ko kuganira na Xi aribwo buryo bwiza cyane bwo gukemura amakimbirane ari hagati ya Leta Zunze Ubumwe za Amerika n’u Bushinwa, arimo umusoro, amakimbirane y’ubucuruzi, ubucuruzi butemewe bwa fentanyl n’ibindi bibazo bitandukanye.