Ministeri y’ubuzima mu Rwanda yatangije igikorwa cyo gukingira no gutera inkingo za covid-19 hibandwa ku bakora muri serivisi z’ubuzima.
Gahunda yo gukingira Covid-19 mu Rwanda yatangiriye ku bafite ibyago byo kwandura kurusha abandi by’umwihariko abita ku barwaye iyi virus mu mavuriro, nk’uko byatangajwe na minisiteri y’ubuzima.
Minisiteri y’ubuzima ivuga ko iri gukoresha inkingo zemewe na OMS/WHO u Rwanda rwabonye ku mubare muto “binyuze mu bufatanye mpuzamahanga”.
Minisiteri y’ubuzima ntiyatangaje ubwoko bw’urukingo ruri gutangwa, gusa hari amakuru avuga ko abatangiye gukingirwa muri iki cyumweru bari guterwa urukingo urwa Pfizer.
Muri aka karere u Rwanda nicyo gihugu gitangiye iyi gahunda mbere y’ibindi, muri Africa ibindi bihugu byatangiye gutanga urukingo birimo Algeria, Maroc, Mauritius, Equatorial Guinea, Misiri na Seychelles.
Abategetsi mu Rwanda bavuga ko muri uku kwezi biteguye kwakira inkingo zivuye muri gahunda mpuzamahanga ya Covax hamwe n’umuryango w’ubumwe bwa Africa.
Itangazo minisiteri y’ubuzima yacishije ku rubuga rwa Twitter rivuga ko izo nkingo niziboneka gahunda yo gukingira umubare w’abantu wisumbuyeho ari bwo izakurikiraho.
Ku munsi nk’uyu mu mwaka ushize, nibwo Misiri yatangaje umuntu wa mbere wanduye Covid-19, nibwo bwa mbere iyi ndwara yari igeze muri Africa.
Kugeza ubu, ministeri y’ubuzima mu Rwanda ivuga ko hamaze kuboneka abantu barenga 17,000 banduye iyi virus, mu gihe abagera kuri 239 yabishe.
Comments are closed.