Twitter yahagaritse konti bwite ya Depite wo muri Amerika Marjorie Taylor Greene kubera gukomeza guhonyora amategeko yayo abuza gukwirakwiza ku bushake amakuru atari ukuri kuri coronavirus.
Iki gihano cyafatiwe uyu Depite wo mu ishyaka ry’abarepubulikani, kijyanye n’uburyo bwayo bw’igihano buzwi nka ‘strike’, bushakisha ubutumwa bujyanye n’iyi virusi bushobora guteza ibyago.
Mbere yaho, iyi kompanyi y’ikoranabuhanga yari yarahagaritse inshuro enye uyu Depite uhagarariye leta ya Georgia.
Depite Greene yavuze ko ihagarikwa rye ryerekanye ko iyi kompanyi ari “umwanzi w’Amerika”.
Mu itangazo rirerire yashyize ku rubuga nkoranyambaga Telegram, uyu mugore w’imyaka 47 yavuze ko “imbuga nkoranyambaga ntizishobora kubuza ukuri gukwirakwira henshi”, ashinja Twitter gufasha abanzi atavuze mu “mpinduramatwara ya gikomunisiti”.
Konti ye nka Depite, abakozi be bigaragara ko atari kenshi bayitangazaho, yo iracyakora.
Kumuhagarika kuri Twitter bibaye nyuma yuko ku wa gatandatu atangaje, bitari ukuri, ko hari “umubare munini cyane w’impfu mu bakingiwe Covid” muri Amerika.
Mu itangazo yahaye BBC dukesha iyi nkuru, umuvugizi wa Twitter yavuze ko Depite Greene yaciwe kuri uru rubuga kubera “gukomeza” guhonyora amategeko ajyanye na gahunda yayo yo kurwanya amakuru ayobya kuri coronavirus, ateganya kwihaniza inshuro enye harimo no guhagarikwa kuri uru rubuga mu buryo butandukanye, mbere yo gucibwa ku rubuga bya burundu.
Mu kwezi kwa munani, uru rubuga nkoranyambaga rwari rwaramwihanije ku nshuro ya kane nyuma yuko atangaje ibitari ukuri ko inkingo za coronavirus zarimo “kunanirwa”, agasaba abashinzwe kwemeza ikoreshwa ryazo mu gihugu kutagira izindi nkingo baha uburenganzira bwo gukoreshwa.
Umuvugizi wa Twitter yagize ati: “Twarabisobanuye neza ko, bijyanye n’uburyo bwacu bw’amategeko ajyanye n’iyi ngamba, tuzahagarika burundu konti zikomeza guhonyora iyi ngamba”.
Kuva yatorwa mu mwaka wa 2020, Depite Greene amaze kuba umwe mu banyapolitiki bo muri Amerika bateza impaka zikomeye.
Amaze igihe ashyigikira bikomeye ibivugwa bidafitiwe gihamya n’uwahoze ari Perezida w’Amerika Donald Trump ko amatora ya perezida yo mu 2020 yabayemo uburiganya, ndetse mu gihe gishize byavuzwe ko hari aho ahuriye n’itsinda QAnon rikwirakwiza ibivugwa bitari ukuri.
Nubwo Amerika ikomeje kugorwa no guhagarika icyorezo cya coronavirus, kimaze kwica abantu barenga 825,000 muri iki gihugu, we yakomeje kurwanya bikomeye ingamba zigamije guhangana n’iyi virusi.
Akunze gushidikanya ku kamaro k’inkingo, kandi mu nteko ishingamategeko yagiye acibwa amande ajyanye no kwanga gukurikiza ingamba zo kwirinda coronavirus, zirimo n’izijyanye no kwambara agapfukamunwa mu nteko.
Comments are closed.