Venezuela iri gushaka abakorerabushake bageragerezwaho urukingo rwa covid-19

Perezida Nicolás Maduro wa Venezuela yatangaje ko agiye gusaba abakorerabushake kuboneka bakageragerezwaho urukingo rwa Covid-19 rwakozwe n’Uburusiya.

Tariki 11 z’uku kwezi kwa munani, Uburusiya ni cyo gihugu cya mbere cyatangaje ko cyageze ku rukingo rwa coronavirus.

Gusa inzobere zikemanga ko rwaba rwarakorewe igerageza rikwiriye.

Guverinoma ya Venezuela, ikunze guhabwa inkunga n’inguzanyo n’Uburusiya, ivuga ko yifuza kugira uruhare mu igeragezwa ry’urwo rukingo.

Ku cyumweru, Bwana Maduro yagize ati: “Mu minsi iri imbere, turaza gusaba abakorerabushake ko baza bagakingirwa.”

Abahanga muri siyansi mu Burusiya bavuga ko amagerageza y’ibanze y’urukingo yasanze rukora – nubwo kwemeza urukingo ku isi bibaho nyuma y’igerageza rikorwa ku bantu ibihumbi.

Uretse Uburusiya, leta ya Venezuela yanamaze kwemera ko yiteguye gufasha mu kugerageza urukingo rw’Ubushinwa hamwe n’urukingo rwa Cuba, inkingo zose z’iki cyorezo.

Ubushinwa, Cuba n’Uburusiya ni inshuti za Nicolás Maduro, ukuriye guverinoma yanzwe n’ibihugu birenga 50, birimo Ubwongereza na Amerika, bikemeza mukeba we Juan Guaidó nka perezida w’inzibacyuho.

Bwana Guaidó ukuriye inteko ishingamategeko ya Venezuela – urwego rwonyine rugenzurwa n’uruhande rutavuga rumwe n’ubutegetsi – yemeje ko ari we perezida w’inzibacyuho mu kwezi kwa mbere 2019 nyuma y’amatora ataravuzweho rumwe yasubije ku butegetsi Bwana Maduro.

Bwana Maduro ushyigikiwe n’igisirikare, guverinoma ye yafatiwe ibihano n’amahanga bituma isigara icungira cyane ku nguzanyo z’Uburusiya n’ibindi bihugu isigaranye by’inshuti.

Nyuma y’uko Uburusiya bwemeje ko bwabonye urukingo rwa Covid-19, bakarwita Sputnik V, Bwana Maduro yashimiye Uburusiya iyo ntambwe.

Tariki 16 z’uku kwezi kwa munani yagize ati: “Uwa mbere uzakingirwa ni njyewe. Ngiye gufata urwo rukingo, ngiye gutanga urugero.”

Gusa mu ijambo rye ku cyumweru, ntabwo yavuze niba ari mu bakorerabushake ba mbere bazageragerezwaho uru rukingo muri Venezuela.

Iki gihugu kimaze gutangazaabantu barenga 46,000 banduye coronavirus n’abarenga 380 imaze kwica, imibare iri hasi ugereranyije n’ibihugu by’akarere kirimo.

Abahanga mu buvuzi ariko bavuga ko iyo mibare ishobora kuba iri hasi cyane y’uko ibintu bimeze kuko abaturage ba Venezuela batisuzumisha iki cyorezo batinya kunenwa no gushyirwa mu kato kuko leta yashinje abava mu mahanga kuzana iki cyorezo.