Amatora ya Perezida wa UCI yabereye mu Nama ya 194 ya UCI yabereye muri Kigali Convention Centre kuri uyu wa Kane, tariki ya 25 Nzeri 2025.
Ni inama yabaye mu gihe Umujyi wa Kigali wakiriye Shampiyona y’Isi y’Amagare yitabiriwe n’ibihugu 108 kuva tariki ya 21 kugeza ku ya 28 Nzeri 2025.
Kimwe mu byari kuri gahunda yayo harimo amatora y’inzego zitandukanye zirimo Perezida wa UCI, aho umukandida rukumbi yari David Lappartient wiyamamarije kuyobora iyi Mpuzamashyirahamwe ku nshuro ya gatatu.
Hashingiwe ku ngingo ya 41 y’amategeko shingiro ya UCI, mu gika cyayo cya gatatu: “Iyo hari umukandia umwe ku mwanya cyangwa hari abakandida benshi bangana n’imyanya, amatora aba nta gutanga amajwi kubayeho.”
Ni ku bw’iyo ngingo, David Lappartient yemejwe nka Perezida wa UCI kugeza mu 2029.
Lappartient ayobora UCI kuva mu 2017, aho yahigitse Brian Cookson wayobora iyi Mpuzamashyirahamwe y’Umukino w’Amagare. Yongeye gutorwa mu 2021, ubwo yari umukandida rukumbi.
Uyu mugabo w’imyaka 52, usanzwe ari Umunyamuryango wa Komite Olempike Mpuzamahanga kuva mu 2022, yiyamamarije kuba Perezida w’uru rwego muri Werurwe 2025, ariko ntiyatsinda.
Mbere yo kujya muri UCI, Lappartient yayoboye Ishyirahamwe ry’Umukino w’Amagare mu Bufaransa (FFC) ndetse n’Impuzamashyirahamwe y’Umukino w’Amagare i Burayi (UEC).
Mu gihe cya vuba, yafatanyaga kuyubora UCI no kuba Perezida wa Komite Olempike y’u Bufaransa, ariko izi nshingano za nyuma azihagarika muri Gicurasi 2023.
Mu Nama ya 194 ya UCI yafunguwe ku mugaragaro na Perezida Paul Kagame, hemejwe kandi ibindi bihugu bizakira Shampiyona y’Isi y’Amagare kugeza mu 2031.
Umujyi wa Montreal (Canada) uzakurikira uwa Kigali wakire Shampiyona y’Isi mu 2026, hakurikireho French Alps (u Bufaransa) mu 2027, Abu Dhabi (Leta Zunze Ubumwe z’Abarabu) mu 2028, Roskilde (Danemark) mu 2029, Brussels (u Bubiligi) mu 2030 na Trentino (u Butaliyani) mu 2031.
Comments are closed.