Umunyapolitike Kizza Besigye utavuga rumwe n’Ubutegetsi buriho muri Uganda yafungiwe muri gereza ya gisirikare i Kampala nyuma y’iminsi micye yari amaze muri Kenya.
Ni ibyatangajwe kuri uyu wa Gatatu, tariki 20 Ugushyingo 2024, na Winnie Byanyima usanzwe ari umugore wa Kizza Besigye aho avuga ko yashimuswe kuwa Gatandatu avuye I Nairobi .
Mu butumwa bwe yanyujije kuri X, uyu mugore usanzwe uyobora Ishami ry’Umuryango w’Abibumbye Rishinzwe Kurwanya SIDA ( UNAIDS), yagize ati ” Ndasaba ubutegetsi bwa Uganda kurekura umugabo wanjye Dr. Kizza Besigye.”
Uyu mugore yavuze ko atumva uburyo, uyu mugabo we yaba afungiye muri gereza ya Gisirikare kandi atari umusirikare.
Amakuru akavuga ko yaba yarakatiwe muri Kenya aho yari yagiye mu muhango wo kumurika igutabo, nyuma akoherezwa i Kampala.
Ibinyamakuru by’imbere mu gihugu bitangaza ko ubu abarwanashyaka benshi b’ishyaka FDC rya Besigye, bateraniye ku Rukiko rwa Gisirikare rwa Makindye i Kampala aho ashobora kuza kuburanira no kubwirwa ibyaha arengwa.
Kiza Besigye w’imyaka 68 y’amavuko, ni umwe mu Banyapolitike bakomeye muri Uganda aho amaze kwiyamamaza inshuro enye ahanganya na Perezida Museveni mu matora ariko ntatorwe.
Uyu kandi yahoze ari umuganga wa Museveni mu ntambara barwanye bafata ubutegetsi muri Uganda, nyuma ahinduka uwo muri Opozisiyo.
Itabwa muri yombi rye ryongeye gutuma Kenya itarebwa neza n’abaharanira uburenganzira bwa muntu nyuma y’uko no muri Nyakanga, yari yafashe abantu 36 baturutse muri Uganda, ikabasubiza icyo gihugu ubu bakaba bari mu nkiko baregwa ibyaha bijyanye n’iterabeoba.
Comments are closed.