Minisiteri y’ubuzima ya DR Congo yatangaje ko hadutse icyorezo cya Ebola, nyuma y’uko ibaruye abantu 15 bishwe na yo n’abandi 28 iri gukekwaho mu duce twa Bulape na Mweka mu ntara ya Kasai mu majyepfo ashyira uburengerazuba bw’iki gihugu.
Iyi minisiteri yatangaje ko uwa mbere wayibonyweho ari umugore w’imyaka 34 wari utwite, washyizwe mu bitaro tariki 20 z’ukwezi gushize kwa Kanama i Bulape afite ibimeyetso by’umuriro ukabije, kuva amaraso mu bice binyuranye, no kuruka cyane, uyu mugore yapfuye tariki 25 Kanama 2025 nyuma y’uko ingingo ze nyinshi zihagaze, bikavugwa ko ubu hari abarwayi batandatu bafite ibimenyetso nk’ibye barimo gukurikiranwa.
Muri 15 bamaze gupfa, bane (4) bari abakozi bo kwa muganga barimo umuforomokazi n’umutekinisiye wa laboratoire.
Minisiteri y’ubuzima ya DRC ivuga ko ubu iki cyorezo kibonetse muri iki gihugu ku nshuro ya 16 – bwa mbere cyahabonetse mu 1976.
Ishami rya ONU ryita ku buzima ku isi (OMS/WHO) rivuga ko itsinda ryo gutabara byihuse mu gihugu hamwe na OMS bohereje abakozi n’ibikoresho muri kariya karere gufasha kuvura, gukurikirana, no kurinda ko iki cyorezo gikwirakwira.
Dr Mohamed Janabi, umukuru wa OMS mu karere yagize ati: “Turimo gukorana umuhate kandi vuba kugira ngo duhagarike ikwirakwira ry’iyi virus.”
Janabi avuga ko barimo gukorera kandi ku bunararibonye DRC ifite mu guhangana n’ibyorezo bya virus kugira ngo “tuyihagarike vuba bishoboka”.
DR Congo ifite ububiko bunini bw’imiti ifasha kwita ku burwaye iyi virus ndetse na doze 2,000 z’urukingo rwa Ervebo Ebola rukora mu kurinda ubwoko bw’iyi virus bwabonetse.
Izo nkingo byitezwe ko zivanwa i Kinshasa zikajyanwa muri Kasai gukingira abakozi bari imbere mu guhangana n’iki cyorezo hamwe n’abantu bakoranyeho n’abarwaye iyi ndwara ubu.
Ebola yaherukaga kwibasira DR Congo muri Mata(4) 2022 ubwo yabonekaga mu ntara ya Equateur aho yishe abantu batandatu.
Iyabonetse hagati ya 2018 na 2020 ni yo yishe abantu benshi, 2000.
Iyi virus bikekwa ko yaturutse mu ducurama hafi y’uruzi Congo.
Abantu bayandura iyo bakoze ku matembabuzi y’abafite iyi virus ya Ebola.
Comments are closed.