Inama nkuru y’ishyaka riri ku butegetsi ‘Chama Cha Mapinduzi’ (CCM) yemeje Perezida John Magufuli nk’umukandida waryo mu matora ya perezida ateganyijwe kuba mu kwezi kwa cumi uyu mwaka.
Iyi nama yateranye kuri iki cyumweru mu murwa mukuru wa politike, Dodoma, yatoye Bwana Magufuli ku majwi 1822, angana na 100% by’abatoye bose.
Bwana Magufuli w’imyaka 60 y’amavuko uri ku butegetsi kuva mu 2015, yatorewe kwiyamamariza manda ya kabiri y’imyaka itanu – ari nayo ya nyuma yemewe n’itegekonshinga rya Tanzania.
Mu bitabiriye amatora harimo n’abo mu ishyaka rya CNDD FDD mu Burundi
Mu bandi bitabiriye iyo nama, harimo abahagarariye ibihugu nk’u Burundi, Mozambique, Repubulika ya Demokarasi ya Kongo, Sudani y’epfo na Vietnam.
Nkuko byavuzwe na Bashiru Ally, umunyamabanga mukuru wa CCM, iri shyaka ryanatangaje gahunda yaryo y’ibikorwa mu myaka iri imbere, harimo guha akazi abaturage bagera kuri miliyoni 8 no guteza imbere ubuhinzi no kwihaza mu biribwa n’ibijyanye n’amazi n’amashanyarazi (cyangwa umuyagankuba mu Kirundi).
Perezida Magufuli ashimagizwa ku kuyobora ibikorwa byinshi by’iterambere, ariko abamunenga barimo n’imiryango iharanira uburenganzira bwa muntu bavuga ko yakoresheje umwanya we mu gutoteza abatavuga rumwe na we no guhonyora ubwisanzure bw’itangazamakuru.
Comments are closed.