U Rwanda binyuze mu kigo cy’igihugu gishinzwe itermbere (RDB) bongereye amasezerano n’irushanwa rya basketball rihuza amakipe yabaye aya mbere iwayo (BAL) yo gukomeza gutegura no kwakira imikino ya kamarampaka n’imikino ya nyuma mu gihe kingana n’imyaka 3 iri imbere.
Ni umuhango urimo kubera muri Kigali Marriot Hotel aho witabiriwe n’umuyozi mukuru wa BAL Amadou Gallo Fall, Minisitiri wa siporo mu Rwanda Aurore Mimosa Munyangaju hamwe n’umuyozi mukuru wa RDB Claire kamanzi ndetse n’abandi bayobozi batandukanye babarizwa mu gice cya siporo harimo n’abayozi b’amakipe.
Imikino ya nyuma ya BAL izakinirwa mu Rwanda mu myaka ya 2024, 2026 na 2028 ibi kandi bikazajya bibisikana n’imikino ya kamarampaka (Playoffs)
Gahunda iteye ite?
Mu mwaka utaha wa 2024 u Rwanda ruzakira imikino ya nyuma (Finals).
Mu mwaka wa 2025 u Rwanda ruzakira imikino yo mu matsinda (conference Games).
Mu mwaka wa 2026 u Rwanda ruzongera kwakira imikino ya nyuma (Finals).
Mu mwaka wa 2027 u Rwanda ruzakira imikino yo mu matsinda (conference Games)
Mu mwaka wa 2028 ari nawo wa nyuma ku masezerano, u Rwanda ruzakira imikino ya nyuma (Finals)
Kuva iri rushanwa ryatangira mu mwaka wa 2021, imikino ya nyuma (Finals) yose yabereye mu Rwanda aho mu mwaka wa mbere, igikombe cyegukanywe n’ikipe ya Zamalek yo mugihugu cya misiri.
Mu mwaka 2 wiri rushanwa BAL yegukanywe n’ikipe ya US Monastir yo muri Tunisia naho muri uyu mwaka ari nawo uheruka igikombe cyegukanywe na AL AHLY yo mugihugu cya Misiri.
Mu nshuro 3 iri rushanwa rimaze riba, amakipe ya PATRIOTS na REG BBC ni zo kipe zo mu Rwanda zagiye zihagararira u Rwanda, muri izi nshuro zose nta kipe yo mu Rwanda irashobora kujyera ku mukino wa nyuma uretse ikipe ya PATRIOTS yageze muri ½ muri 2021 naho ikipe ya REG yo ntirarenga muri ¼.
Kuva iri rushanwa ryatangira gusoreza imikino yaryo mu Rwanda, BAL yagiye ihuriza abantu benshi I Kigali bavuye hirya no hino ku isi. Bamwe mu bitabiriye binganjemo ibyamamare, abayobozi bakomeye mu bihugu bitandukanye, abakinnyi ndetse n’abakunzi b’umukino wa Basketball.
Uyu mukino ukaba waraje kwifashishwa nka kimwe mu bikurura ba mucyerarugendo benshi mu Rwanda.
Imikino ya nyuma (Final) iba igizwe n’amakipe 8 aturutse mu matsinda (conferences) abiri (2) ariko aba yarabanjirijwe n’amajonjora y’ibanze akorwa mu bihugu bitandukanye kujyeza hasigaye amakipe 12 ari yo agabanywa mu matsinda kugeza bigeze ku mukino wa nyuma.
BAL yamaze gufata imitima y’abatari bacye ku isi dore ko ubwo riheruka kubera mu Rwanda, amatike yo kureba iyi mikino yashize (sold-out) inshuro 2 zose ibi bikaba ari byo byabaye imbarutso y’uko u Rwanda rwongera gukomezanya n’iri rushanwa.
Comments are closed.