U Rwanda ruzakenera akayabo k’amafranga agera kuri miliyari 100 kugira ngo abaturarwanda basaga miliyoni 12 bahabwe urukingo rwa Covid-19.
Hamaze iminsi hibazwa igihe urukingo rw’icyorezo cya Covid-19 ruzabonekera, mu ntangiriro z’iki cyumweru nibwo igihugu cy’Ubwongereza cyateye intambwe kiba igihugu cya mbere cyatangiye gukingira abaturage bayo ubwo ku ikubitiro hakingiwe umukecuru w’imyaka 90 y’amavuko.
Kugeza ubu benshi bibazaga igihe urwo ruingo ruzagera mu Rwanda n’ikiguzi cyarwo kugira ngo buri muturarwanda azakingirwe, ibyo byose ndetse n’ibindi bijyanye n’urukingo byashyizwe hanze na ministeri y’ubuzima mu kiganiro yagiranye n’igitangazamakuru cya “igihe”`
Ministre Dr NGAMIJE Daniel yagize ati:”Urukingo rubonetse kuko inganda nazo zigomba gutangira kurukora kandi zihereza ibihugu byose ku Isi, ni ukuvuga ngo nibura abagera kuri 20% inkingo twazibona mu mpera z’ukwezi kwa gatatu umwaka utaha hanyuma abandi bakazagenda bakurikira uko inganda zigenda zongera ubushobozi bwazo bwo gukora inkingo.”
IKIGUZI CYA BURI RUKINGO
Ministre Nagamije yakomeje avuga ko Buri rukingo mu ziri kugeragezwa zashyiriweho igiciro ku buryo bizwi ngo nk’umuntu umuntu atewe inshuro imwe (dose) igura aya mafaranga, hanyuma yaterwa ebyiri, ikiguzi kingana gutya na gutya.
Nk’urukingo rwa AstraZeneca, nirwo ruhendutse muri zose. Dose imwe igura amadolari ane, ni hafi 4000 Frw. Bisobanuye ko u Rwanda rushatse gukingira abaturage bose b’igihugu bagahabwa dose ebyiri nk’uko biteganywa, wasanga rwakwishyura asaga miliyari 100 Frw.
Urukingo rwakozwe n’Abanyamerika rwa Moderna rwo rugura amadolari 33 ya Amerika, ni ukuvuga asaga ibihumbi 32 Frw, urwakozwe na Pfizer na BionTech rwo rugura amadolari 20, ni hafi ibihumbi 20 Frw.
Sputnik V rwakozwe n’ikigo Gamaleya cy’Abarusiya rwo rugura amadolari icumi, ni hafi ibihumbi 10 Frw.
Minisitiri Dr Ngamije yakomeje avuga ko ubu hataramenyekana neza amafaranga azatangwa n’igihugu muri ibi bikorwa byo gushaka urukingo no gukingira abaturage, kuko kizagenwa hashingiwe ku gaciro k’urukingo igihugu cyabonye.
Ati “Hari inkingo utera dose ebyiri, hari izo utera imwe, kandi buri imwe ifite igiciro. Ubu rero kuko tutaramenya urukingo tuzatera, ni ikigereranyo navuga kinini cyane kuko ni hafi miliyoni 15 z’amadolari kuzakingira abo bantu bose 60% by’abaturage ariko bishobora guhinduka, kugabanuka cyangwa bikiyongera bitewe n’urukingo ruzahabwa.”
“Niba tuzahabwa urukingo utera urushinge rumwe cyangwa niba tuzahabwa urukingo utera inshuro ebyiri kugira ngo umuntu abe akingiye. Ni umubare umuntu yakwita uw’agateganyo.”
Nyinshi mu nkingo ziri mu cyiciro cya nyuma cy’igerageza zitangwa inshuro ebyiri kugira ngo abantu babe bizeye ko bakingiwe koko.
Dr Ngamije yaciye amarenga ko u Rwanda rushobora kuzakoresha urukingo rwakozwe na Kaminuza ya Oxford rwa AstraZeneca kuko uburyo bwo kurwitaho butagoye, ari kimwe n’izindi nkingo zikoreshwa mu gihugu.
Ati “Ruriya rwa AstraZeneca ni urukingo rutatuvuna cyane mu buryo bwo kubika inkingo.”
Comments are closed.