Rutahizamu Mason Greenwood w’ikipe ya Manchester United yatawe muri yombi acyekwaho gufata ku ngufu no gukubita nyuma yuko hatangajwe ibirego ku mbuga nkoranyambaga.
Polisi ikorera mu mujyi wa Manchester yavuze ko yamenyeshejwe iby'”amafoto na videwo byo ku mbuga nkoranyambaga byatangajwe n’umugore amenyesha iby’urugomo yakorewe”.
Polisi yongeyeho iti: “Dushobora kwemeza ko umugabo wo mu kigero cy’imyaka 20 yamaze gutabwa muri yombi acyekwaho gufata ku ngufu no gukubita”.
Aracyafunzwe ahatwa ibibazo kandi amaperereza arakomeje.
Mbere yaho, Manchester United yari yavuze ko uwo mukinnyi atazasubira mu myitozo cyangwa mu mikino kugeza itanze irindi tangazo.
Iyi kipe yavuze ko “itihanganira urugomo urwo ari rwo rwose” kandi ko yamenyeshejwe ibyo birego byo ku mbuga nkoranyambaga, ariko ko nta kindi kintu itangaza kugeza ubwo “ibyabaye bizaba byamaze kumenyekana”.
Mason Greenwood nta cyo yasubije kuri ibyo birego byo ku mbuga nkoranyambaga.
Uyu mukinnyi w’imyaka 20 – wakinnye umukino we wa mbere muri United mu kwezi kwa gatatu mu 2019 – mu kwezi kwa kabiri mu 2021 yasinye kontaro y’imyaka ine akinira iyi kipe, nyuma yuko azamutse avuye mu ishuri ryigisha umupira rya United.
(BBC)
Comments are closed.