Abantu bagera kuri 21 nibo bamaze gutakaza ubuzima bwabo mu mvururu zakurikiye amatora ya Perezida yabaye muri uku kwezi mu gihugu cya Guinée-Conakry.
Imvururu hagati y’abatavuga rumwe na Leta n’inzego z’umutekano zarakomeje mu mpera z’icyumweru gishize ubwo Komisiyo y’Amatora yatangazaga ko Perezida Alpha Condé ari we watsinze amatora, bikamuha amahirwe yo kuyobora manda ya gatatu.
Cellou Diallo utavuga rumwe n’ubutegetsi, yavuze ko atemera intsinzi ya Alpha Condé kuko amatora yabayemo uburiganya. Diallo yemeje ko ari we Mukuru w’Igihugu.
Muri Werurwe uyu mwaka nibwo Itegeko Nshinga ryavuguruwe, Alpha Condé yemererwa kwiyamamariza manda ya gatatu nyuma y’imyaka icumi ayoboye Guinée-Conakry.
Umuryango w’Abibumbye n’Umuryango wa Afurika Yunze Ubumwe bohereje intumwa i Conakry kugerageza kunga impande zishyamiranye.
Comments are closed.