Inzobere zivuga ko Ibyago virusi ya monkeypox iteje biri ku kigero cyo hasi cyane

Ishami ry’umuryango w’abibumbye ryita ku buzima (OMS/WHO) rivuga ko indwara ya monkeypox ishobora guhagarikwa mu bihugu byo hanze y’Afurika aho iyi virusi ubusanzwe idakunze kugaragara.

Abantu barenga 100 bamaze kwandura iyi virusi i Burayi, ku mugabane w’Amerika no muri Australia.

Iyi ndwara ituma abayanduye bishimashima ndetse bagahinda umuriro.

Byitezwe ko uwo mubare ukomeza kuzamuka, ariko inzobere zivuga ko muri rusange ibyago iyi virusi iteje ku baturage biri ku kigero cyo hasi cyane.

Mu kiganiro n’abanyamakuru ku wa mbere, Maria Van Kerkhove ukuriye itsinda rirwanya indwara z’ibyaduka muri OMS, yagize ati: “Ibi ni ibintu bishobora guhagarikwa”.

Akomoza ku banduye baherutse kuboneka i Burayi no muri Amerika ya ruguru, yagize ati: “Turashaka guhagarika ubwandu bw’umuntu ku muntu. Dushobora gukora ibi mu bihugu [iyi virusi] itabayemo akarande”.

Ubu iyi virusi imaze kwemezwa ko yabonetse mu bihugu 16 byo hanze y’Afurika.