Ejo kuwa mbere gusa umutungo wa Jeff Bezos wiyongereyeho miliyari $13, kwiyongera k’umutungo w’umuntu umwe ko hejuru cyane kubayeho kuva mu 2012 ikigo Bloomberg cyashyiraho uburyo bwo kubara imari y’abaherwe ba mbere ku isi buri munsi.
Imigabane ya Amazon.com ya Jeff Bezos ejo yazamutseho 7.9%, ikigero cyo hejuru kuva mu kwa 12/2018 nk’uko bivugwa n’ikinyamakuru The Time.
Bwana Bezos w’imyaka 56 niwe muntu ukize cyane kurusha abandi ku isi.
Muri uyu mwaka gusa, imari ye yavuye kuri miliyari $74 igera kuri miliyari $189, nubwo bwose ubukungu bw’igihugu cye, Amerika, bwazahajwe n’icyorezo cya Coronavirus.
Ubu we ku giti cye, ararusha agaciro ku isoko ry’imari ibigo bya rutura nka Exxon Mobil Corp., Nike Inc. na McDonald’s.
Mackenzie Bezos, wahoze ari umugore we, ejo kuwa mbere nawe yungutse miliyari $4.6, ibi bituma ubu ari umuntu wa 13 ukize cyane ku isi nk’uko iki kinyamakuru The Time kibivuga.
Uyu mugore aherutse kubona imari nini cyane kubera gatandukana na Jeff Bezos akagira umutungo agenerwa n’inkiko kuwo bahahanye.
Ibindi bigo bitandukanye by’ikornabuhanga bikomeje kungukira mu kuba abantu ubu benshi baguma mu ngo zabo, akaba ari ho baharira cyangwa bakorera ibikorwa by’imari.
Mark Zuckerberg ukuriye ikigo cya Facebook Inc. muri uyu mwaka kugeza ubu umutungo we wiyongereyeho miliyari $15, nubwo ubu kompanyi ye hari ibigo byahagaritse kuyamamarizaho.
