Misiri: Abakobwa 5 bakatiwe gufungwa imyaka 2 kubera gushyira amavidewo y’urukozasoni kuri tik tok

Urukiko rwo mu Misiri rwahanishije igifungo cy’imyaka ibiri abakobwa batanu kubera gushyira kuri TikTok “amashusho ateye isoni”

Aba bakobwa batatangajwe amazina bose, banaciwe ihazabu y’amadorari ya Amerika $19,000 (ni hafi miliyoni 19 mu mafaranga y’u Rwanda).

Igihano cyo gufungwa nicyo cya mbere gitanzwe n’urukiko mu nkubiri y’abategetsi baho yo kurwanya abantu ‘bakurikirwa cyane’ ku mbuga nkoranyambaga.

Impirimbanyi z’uburenganzira bwa muntu zamagana ibiri gukorerwa bene abo, zigasaba ko abafunzwe barekurwa.

Al-Ahram ikinyamakuru cya leta cyatangaje ko “urukiko rw’ubucuruzi rw’i Cairo rwahanishije Mawada al-Adham na Haneen Hossam n’abandi batatu gufungwa imyaka ibiri n’ihazabu ya 300,000 y’amapawundi ya Misiriri buri umwe.

“Barashinjwa kurenga ku muco n’ibigenga umuryango w’Abanyamisiri, batangaza amafoto n’amashusho ateye isoni abangamiye imyifatire ya rubanda”

Abakobwa batatu batatangajwe amazina nabo bashinjwa imyifatire idakwiriye mu guhamagarana n’abagabo bakoresheje videwo.

Nibwo bwa mbere urukiko mu Misiri ruhannye abagore bakurikirwa n’abantu benshi ku mbuga nkoranyambaga, ni nyuma y’uko mu gihe cya vuba hari benshi bafashwe bagafungwa cyane abakobwa bazwi cyane kuri TikTok.

Hossam yafashwe mu kwezi kwa kane, amaze gutangaza videwo abwira abamukurikira bagera kuri miliyoni 1.3, ko abakobwa bashobora gukorera amafaranga mu gukorana nawe nk’uko AFP ibivuga.

Adham yafashwe mu kwezi kwa gatanu amaze gutangaza videwo yo gutebya kuri TikTok na Instagram aho afite nibura abantu miliyoni 2 bamukurikira.

Bashinjwe ibyaha byo “gukangurira abandi icyaha” n'”ubukozi bw’ibibi” mu byo bashyira kuri izi mbuga, nubwo hatazwi neza neza amashusho n’amafoto abategetsi badashaka.

Mu mategeko ya Misiri, ikirego cyo “gukangurira abandi icyaha” gikoreshwa mu gushinja abantu ibyaha bitandukanye.

Ubushinjacyaha kenshi busobanura iki cyaha nk’ikintu “kinyuranyije n’imico n’imigenzo by’Abanyamisiri”.

Ikoreshwa rya TikTok ryarazamutse cyane mu mezi macye ashize mu Misiri, kubera igihe leta yategetse abantu kuguma mu ngo mu kwirinda ikwirakwira rya Covid-19.