Centre Scolaire Sedes Sapientiae Karwasa ni igicumbi cy’ubuhanga.
Sedes Sapientiae/ Karwasa ni ikigo cy’ishuri cy’Abihayimana(Biyeguriye Krisitu umwami)bakaba babarizwa mu muryango mugari washinzwe na Padiri Mauri.
Iki kigo giherereye mu mu karere ka Musanze; Umurenge wa Cyuve Akagari ka Bukinanyana mu mudugudu wo Mubwiza.Ni kunshuro ya mbere iki kigo gikoze umuhango w’ikirori gisoza icyiciro cy’amashuri y’inshuke “Nursary graduation” ku bana 14, dore ko gifite amashuri y’inshuke kuva mu wa mbere kugeza mu wa gatatu.
Aba bana barangije iki cyiciro hamwe na bagenzi babo barangije mu mwaka wa kabiri bavuye mu bindi bigo. Iki kigo gifite n’abiga mu mashuri abanza kuva mu wa mbere kugera mu wa gatatu, aba nabo bavuye mu bindi bigo. Bose hamwe ni abana 124, barimo 66 bo muy’inshuke “Maternelle” na 58 bo mu abanza “Primaire”.
Uyu muhango watangijwe n’umuyobozi w’ikigo Soeur Valantine NTAKIRUTIMANA.
Umuhango wabimburiwe n’umutambagiro, bazenguruka umudugudu wo Mubwiza.
Ni ibirori byitabiriwe n’abantu benshi, barimo,Ababyeyi b’abana bahawe impamyabumenyi(certificate) n’indangamanota(bulletin), Abandi babyeyi bajye gufata indangamanota z’abana babo biga muri Maternelle ya1 n’iya2; Abana biga mu mashuri abanza bo mu wa1,Mu wa2 no mu wa3 n’ababyeyi babo.
Abayobozi mu nzego z’ibanze n’abahagarariye abandi babyeyi; Soeur Vestine Marie BENIMANA, intumwa ya Soeur Marie Charlotte UWIMANA uhagarariye umuryango w’Ababikira biyeguriye Krisito umwami mu Rwanda utabashije kuboneka kubera yari yitabiriye inama nkuru y’abihaye Imana ku rwego rw’Igihugu.
Mu ijambo ry’ikaze Soeur Valantine NTAKIRUTIMANA yatangiye n’Isengesho; Akurikizaho kwerekana abashyitsi kandi atanga ikaze ku bantu bose baje bitabiriye ibirori, maze asaba umuyobozi ushinzwe amasomo gukomeza kubiyobora.
Muri ibi birori byagaragayemo imbyino; Imivugo n’udukino dushimishije tw’abana, abana biga mu ishuri ry’inshuke berekanye agakino keza ko kuvura abarwayi nka kimwe mu bikorwa bazakora igihe bazaba bashoje amashuri yabo.
Mu mukino umwe yari dogiteri abandi ari abarwayi baje kwivuza, abana bagaragaye nk’abarwayi bazi gutandukanya indwara barwaye no kuzisobanura, nko kumenya gutandukanya imvune n’igisebe.
Ikigo cy’ishuri Sedes Sapientiae cyigisha mu ndimi zose “Igifaransa n’Icyongereza”, abana bahiga n’ubwo bahamaze igihe gito “Umwaka umwe” usanga bazivuga neza, aho umwana wo muri maternelle ya mbere agusuhuza muri rumwe wumva; Akagusaba icyo akeneye ndetse akaba yanakuyobora aho ushaka kugana hose mukavugana adategwa.
Ni abana bahabwa uburezi bufite ireme; Batozwa ikinyabupfura no kubaha Imana ndetse no kubana hagati yabo nk’abavandimwe.
Umuyobozi w’ikigo akaba yatangarije Karibumedia.rw dukesha iyi nkuru ko bafite intego yo kwimura abana ku manota fatizo atari munsi ya 70%, bityo ko bitoroshe kuko bagize imbogamizi zo kubanza kubategura ngo babazamure kandi babashire ku rwego rumwe kuko bavuye mu bigo bitandukanye kandi bitigisha kimwe.
Muri uyu muhango hatanzwe certificate ku bana 14 basoje icyiciro cy’amashuri y’inshuke; Hashimwa kandi bahembera mu ruhame abana3 muri buri shuri, bahize abandi mu gutsinda; Badusomera amanota y’abana n’ikigereranyo cy’impuzandengo muri buri shuri, badutangariza amanota yabo mu buryo bukurikira.
_ Maternelle ya mbere: Uwa mbere yagize 98,3%, ikigereranyo cy’ishuri ryose ni 78,4%;
_ Maternelle ya kabiri: Uwa mbere yagize 96,4%, ikigereranyo cy’ishuri ryose ni 87,1%;
_ Maternelle ya gatatu: uwa mbere yagize 97,4%, ikigereranyo cy’ishuri ryose ni 89%.
Muri rusange byagaragaye ko abana bakoze neza, ndetse no mu cyiciro cy’amashuri abanza(Primaire) Umuyobozi w’ikigo Soeur Valantine NTAKIRUTIMANA yakomeje ashima uko abana bakoze, maze aha umwanya uhagarariye Inama rusange y’ababyeyi Marie Grâce BERWA ngo nawe agire icyo abwira abitabiriye ibirori.
Uyu mubyeyi uhagarariye abandi yatangarije abitabiriye ibirori ko Centre Scolaire Sedes Sapientiae ari igicumbi cy’ubuhanga, ashima kandi yibutsa ababyeyi bagenzi be indangagaciro z’ikigo bo bita urugo, arizo ,”Ukwemera, Ubumenyi n’ubuvandimwe” maze asaba ababyeyi kugenda bagashishikariza abandi kuzazana abana babo mu kigo cyiza Sedes Sapientiae.
Umuhango w’ibirori byari bibereye ijisho wakomeje humvwa ijambo nyamukuru rya Soeur Vestine Marie BENIMANA waje ahagarariye Soeur Marie Charlotte UWIMANA uyobora umuryango w’ababikira biyeguriye Kristu Umwami mu Rwanda.
Yagize ati: “Ijwi ni iryanjye ariko ubutumwa ni ubwa Soeur Marie Charlotte UWIMANA twese dufitanye ubumwe n’ubufatanye, bityo ubutumwa ni bumwe”.
Akomeza ashimira abarezi, abakozi na komite y’ababyeyi, bose bitanze mu murimo utoroshe wo gufatanyiriza hamwe gushyira ku murongo abana baje bagana ikigo baturutse ahatandukanye, ubu bakaba bamaze kuba bamwe haba mu myumvire no mu kinyabupfura (displine).
Ati: “Ndashima Umuryango, Kiriziya n’ubuyobozi bw’igihungu cyacu na Leta yacu, iyobowe na Nyakubahwa Paul KAGAME utuma byose bigerwaho kubera amahirwe yo gukora atanga”.
Yakomeje agira ati: “Ubwenge ni ingenzi kuko ubumenyi butagira umutima nama bwica nyirabwo”.
aboneraho gusaba abana kugira ikinyabupfura kandi bakiga bashyizeho umwete asaba n’ababyeyi gukomeza kwitangira abana babo kugira ngo bazagere kure hifuzwa, harenze aho ababyeyi bageze kuko bifuza kurera umwana ushoboye kandi ushobotse.
Hasojwe humvwa imbyino nziza y’abana bafatanije n’abarezi babo, maze abaraho bose bacinya akadiho, umuhango usozwa n’amatangazo y’umuyobozi w’ikigo wibukije n’ubundi abaraho indanga_ gaciro z’ikigo, arizo: Ukwemera; Ubumenyi n’ubuvandimwe ndetse n’intego nyamukuru y’ikigo yo gutsinda mu buryo bwo hejuru kuko ikigo cyabo bifuza ko kiba igicumbi cy’ubuhanga, maze asaba ababyeyi gukangurira abandi babyeyi kuzazana abana babo bagahabwa ubumenyi bufite ireme.Umuyobozi yasoje ashimira abitabiriye ibirori.
Hakurikiraho Isengesho, abasaba ko bahurira ku meza gufata amafunguro yise ikimenyetso cy’ubuvandimwe n’ubusabane nk’uko biri mu ndanga_ gaciro z’ikigo.
Yanditswe na Ladisilas MANIRAGUHA.
Comments are closed.