Rwanda:Abantu 6 nibo basanzwemo Covid-19 kuri iki cyumweru abandi 7 barakira barasezererwa bataha murugo.

Kuri iki Cyumweru Minisiteri y’Ubuzima yatangaje ko abantu 6 aribo basanganywe Coronavirus mu Rwanda mu bipimo 1160 byafashwe kuri iki cyumweru tariki ya 12 Mata 2020 mu gihe abandi 7 bakize Coronavirus mu masaha 24 ashize.

Kugeza kuri uyu munsi mu Rwanda nta muntu n’umwe urapfa cyangwa ngo ajyanwe mu byumba by’indembe nubwo byateganyijwe,ahubwo hamaze gukira abantu 25.

Uyu munsi hakize 7 biyongera kuri 11 bakize ku munsi w’ejo tariki ya 11 Mata 2020 n’abandi bakize mu minsi ishize.

Aba bantu babonetse ko banduye Covid-19 bahise bashyirwa mu kato ndetse hatangira gushakishwa abo bahuye nabo bose kugira ngo basuzumwe ndetse bitabweho n’inzego z’ubuzima.

Minisiteri y’ubuzima yavuze ko Abarwayi bose bari kuvurirwa ahantu habugenewe kandi bari koroherwa. Abenshi muri bo ubu nta bimenyetso bya Coronavirus bagaragaza. Nta n’umwe urembye.’

Minisiteri y’ubuzima yamenyesheje Abanyarwanda ko Umuntu wese uhisha cyangwa wanga gutanga amakuru arebana n’abahuye n’umuntu wanduye Coronavirus cyangwa agahisha ibimenyetso byayo aba ashyize ubuzima bwa benshi mu kaga kandi abihanirwa n’amategeko.

U Rwanda rwafashe ingamba zirimo guhagarika ibikorwa bitandukanye no kuguma mu rugo mu kwirinda ikwirakwira rya Coronavirus, yarubonetsemo bwa mbere ku wa 14 Werurwe 2020.

Abaturarwanda basabwa gukomeza kubahiriza amabwiriza y’inzego z’ubuzima mu kwirinda ikwirakwira rya Coronavirus, hitabwa cyane cyane ku gukaraba intoki kenshi hifashishijwe amazi meza n’isabune cyangwa alukolo yabugenewe, hanubahirizwa intera ya metero imwe hagati y’umuntu n’undi birinda guhurira ahari abantu benshi bakaguma murugo.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Uko Covid-19 ihagaze mu isi yose muri rusange:

Imibare yo mu gitondo cyo kuri iki cyumweru yagaragaje ko igihugu cya Leta zunze Ubumwe z’Amerika aricyo kimaze gupfusha abantu benshi ku Isi, kuko ubu habarurwa ko abarenga 20,608 bamaze guhitanwa na Coronavirus.

Umubare w’abanduye Coronavirus muri iki gihugu ki igihange ki maze gushegeshwa na Covid-19 ubu bageze kuri 529,951; mu gihe u Butaliyani bwari bwarazahajwe cyane n’iki cyorezo mu minsi ishize bufite abantu 152271 banduye mu gihe abapfuye bo ari 19468.

Muri Espagne hamaze kwandura 163027, abapfuye bo ni 16606 naho u Bufaransa abamaze kwandura ni 130730 naho 13851 bo bakaba bamaze gupfa.

U Budage ni kimwe mu bihugu bifite abantu benshi banduye kuko ari 125,452 ariko abamaze gupfa ni bake ugereranyije n’ibindi kuko ho ari 2871.

Mu Bwongereza abamaze kwandura ni 79,885 mu gihe abapfuye ari 9892. Afurika y’Epfo hamaze kwandura abantu 2028 mu gihe 25 bamaze gupfa.

Muri Afurika hamaze kwandura abantu 14,830,abamaze gupfu ni 615 mu gihe abakize 2,703.

Mu Rwanda abanduye ni 126, mu gihe abamaze gukira ari 25 mu gihe muri Kenya ni 191 naho abapfuye bakaba barindwi. Uganda ifite abantu 53 banduye, Tanzania 32 n’abantu batatu bamaze gupfa.

Ku Isi hose, abantu bamaze kwandura iki cyorezo ni 1,836,338, abamaze gupfa ni 113,255 mu gihe abamaze gukira ari 420,982.

Ngayo nguko dukomeze kubahiriza amabwiriza duhabwa na Minisiteri y’ubuzima.