Leta ya Tanzania – biciye kuri minisitiri mu biro bya perezida ushinzwe ubutegetsi bw’igihugu – yatangaje ko ishyaka Chama Cha Mapinduzi (CCM) ryatsinze amatora y’ubutegetsi bw’imbere mu gihugu ku majwi 99%.
Ayo majwi yabonywe n’iri shyaka riri ku butegetsi angana n’imyanya 4,213 yo mu biro by’inzego z’ubutegetsi muri iki gihugu cy’abaturage miliyoni 67.
Ku rundi ruhande, ishyaka ritavuga rumwen’ubutegetsi rya Chama cha Demokrasia na Maendeleo (CHADEMA) ryatsindiye imyanya 36 ingana na 0.84% by’amajwi ryabonye.
CHADEMA ivuga ko aya matora yaranzwe n’uburiganya no kwica bamwe mu bayoboke bakuru baryo mbere gato y’amatora. Leta ntacyo iravuga ku birego bya CHADEMA.
Aya matora y’abategetsi b’inzego z’ibanze yari igipimo cy’ingenzi ku buryo ishyaka CCM rifatwa muri Tanzania, mbere y’amatora y’umukuru w’igihugu yo mu Ukwakira(10) 2025.
Ibyavuye muri aya matora bitangajwe mu gihe ishyaka CHADEMA rimaze iminsi rinenga uko yakozwe, rivuga ko atubahirije amahame ya demokarasi.
Abakuru ba CHADEMA bavuga ko bamwe mu batora batabashije gutora kuko batigeze bisanga ku rutonde rw’itora.
Rivuga kandi ko bamwe mu bakandida baryo bakorewe urugomo, harimo n’amakuru avuga bamwe mu barikuriye bishwe mbere gato y’amatora yabaye ku wa gatatu.
Ku wa gatatu, Freeman Mbowe ukuriye ishyaka CHADEMA yatangaje ko umwe mu bakandida baryo, Modestus Timbisimilwa, yishwe arashwe na polisi mu murwa mukuru Dar es Salaam arimo kubuza “kwinjiza impapuro mpimbano z’itora” mu biro by’amatora.
CHADEMA yavuze ko undi mukandida wayo, George Juma Mohamed, na we yarashwe agapfa ari iwe mu rugo mu gace ka Mkese hagati muri Tanzania mu ijoro rishyira ku wa gatatu.
Undi mukuru muri iri shyaka, Steven Chalamila, yishwe atemaguwe ari iwe i Tunduma hafi n’umupaka wa Zambia, na we mu ijoro ryo ku wa kabiri, nk’uko iri shyaka ryabivuze.
Mbowe yabwiye BBC ko barimo kwegeranya amakuru y’ibyabaye mu matora mbere y’uko basohora itangazo rimenyesha icyo bazakurikizaho.
Leta ntacyo irasubiza ku bivugwa na CHADEMA.
Umunyamakuru w’ibiro ntaramakuru AFP mu mujyi wa Kigoma yatangaje ko yabonye abatora barwana kubera ibyo bamwe bavugaga ko ari impapuro mpimbano z’itora, byatumye bamwe bafungwa.
Amategeko agenga amatora avuga ko umukandida utanyuzwe n’ibyayavuye mu matora afite uburenganzira bwo kuregera inkiko z’uturere akajuririra ibyayavuyemo.
Iyi ntsinzi ya CHADEMA ishobora kuba ishusho y’amatora ya perezida yo mu 2025.
Perezida uriho ubu – Samia Suluhu Hassan – biteganyijwe ko aziyamamaza nk’umukandida wa CCM. Yagiye ku butegetsi asimbuye uwo yari yungirije John Pombe Magufuli wapfuye mu 2021 ataramara umwaka atangiye manda ye ya kabiri.
Comments are closed.