Abarundi bakorera muri Kenya batangiye kugira impungenge nyuma y’itegeko rishya rigamije kugabanya ubucuruzi bw’abanyamahanga

Abarundi benshi batuye kandi bakorera muri Kenya batangiye kugira impungenge z’ahazaza habo nyuma y’itangazo rya Perezida wa Kenya, William Ruto, rivuga ko abanyamahanga bakora ubucuruzi buciriritse muri icyo gihugu bagomba kubuhagarika bagasubira iwabo cyangwa bagashaka indi mirimo yemerewe abanyamahanga.

Iri tegeko riteganya ko kuva ku wa 7 Nzeri 2026, ibikorwa byinshi by’ubucuruzi buciriritse bizajya bikorwa gusa n’Abanyakenya, mu rwego leta ivuga ko rugamije guteza imbere abaturage bayo no kubaha amahirwe y’akazi n’ubucuruzi.

Abanyamahanga benshi, barimo n’Abarundi batuye muri Kenya, bavuga ko iri tegeko rishobora kubagiraho ingaruka zikomeye kuko bamwe bamaze imyaka myinshi bakorera muri icyo gihugu, abandi bakaba ari ho bakura imibereho y’imiryango yabo. Bamwe mu baganiriye na BBC Gahuza bagaragaje ko bafite ubwoba bwo gutakaza ibikorwa byabo n’imitungo bashoye muri Kenya.

Uhagarariye Abarundi baba muri Kenya yavuze ko Abarundi baba muri Kenya bakwiye gukomeza gutuza no gukurikiza amategeko igihugu kibakira gishyiraho, ariko anasaba ko habaho ibiganiro hagati y’inzego z’ubuyobozi bwa Kenya n’abanyamahanga kugira ngo haboneke ibisubizo bitabangamiye impande zombi. Yagaragaje ko hari Abarundi benshi bafite impushya zemewe kandi bakorera muri Kenya mu buryo bwemewe n’amategeko, bityo ko hakenewe ibisobanuro birambuye ku buryo iri tegeko rizashyirwa mu bikorwa.

More Read

Gisagara: Umusaza bivugwa ko yari amaze iminsi 4 apfiriye mu nzu, yashyinguwe igitaraganya

Imyaka 19 irashize umuhanzi Lucky Dube yishwe

U Bufaransa: Abarenga 1,200 batawe muri yombi mu myigaragambyo yamagana izamuka ry’ikiguzi cy’imibereho

Pakistan: Abana 34 n’umwarimu wabo bagwiriweho n’igisenge cy’inzu barapfa

Abarundi benshi bakora akazi ko gucuruza amandazi n’ubunyobwa mu muhanda

Abasesenguzi bavuga ko iki cyemezo gishobora kugira ingaruka ku baturage b’ibihugu byo mu Muryango wa Afurika y’Iburasirazuba (EAC), cyane cyane abakora ubucuruzi bwambukiranya imipaka, kuko Kenya ari isoko rikomeye ry’ubucuruzi mu karere. Banasaba ko hashyirwa imbere ibiganiro hagati y’ibihugu kugira ngo ubwisanzure bw’abaturage n’ubw’ibicuruzwa bukomeze kubahirizwa.

Nubwo leta ya Kenya ivuga ko iri tegeko rigamije kurengera inyungu z’Abanyakenya, abanyamahanga benshi bakomeje gutegereza ibisobanuro birambuye ku buryo rizashyirwa mu bikorwa n’icyo rizasiga ku bikorwa byabo by’ubucuruzi.