Abashyigikiye Perezida Donald Trump w’Amerika babarirwa mu bihumbi baraye bateraniye i Washington DC mu myigaragambyo yo gushyigikira ibivugwa bidafitiwe gihamya byuko habayeho uburiganya mu matora ya perezida.
Abigaragambya bitwaje amabendera, bahasanzwe n’abanyamuryango b’amatsinda y’abahezanguni arimo itsinda Proud Boys, bamwe bambaye ingofero za ‘casques’ n’amakoti adatoborwa n’amasasu.
Mbere yaho, abashyikigiye Bwana Trump bahundagaye ku rukurikirane rw’imodoka zimutwara ubwo yari anyuze aho ajya ku kibuga cye cy’umukino wa golf.
Joe Biden yatsinze amatora ya perezida yo ku itariki ya 3 y’uku kwezi kwa cumi na kumwe uno mwaka.
Ku wa gatanu, yashimangiye intsinzi ye nyuma yuko bigaragaye ko yatsinze muri leta ya Georgia – bituma aba umukandida w’umudemokarate wa mbere utsinze muri iyo leta kuva mu mwaka wa 1992.
Ubu yatsindiye amajwi 306 y’intumwa zitora (electoral college) – uburyo Amerika ikoresha mu gutora perezida – aruta kure ikigero cy’amajwi 270 aba ari yo ya ngombwa ngo umukandida atsindire kuba perezida.
Ubwo Perezida Trump yari anyuze ahabera imyigaragambyo y’abamushyigikiye ubwo yari agiye ku kibuga cye cy’umukino wa golf
Kugeza ubu Prezida Trump yanze kwemera ibyavuye mu matora, ndetse ubu yatanze ibirego mu nkiko bijyanye na za leta z’ingenzi ngo umukandida atsinde amatora, ariko kugeza ubu ikiko ziravuga ko Bwana Trump yananiwe gutanga gihamya ko habayeho uburiganya mu matora.
