Kenya:Perezida Uhuru Kenyatta yasabye ko utubari dufungura ariko amashuri yo agakomeza gufunga murwego rwo kwirinda Covid-19

7,189

Utubari two muri Kenya twongeye gufungura kuri uyu wa kabiri, nyuma y’amezi atandatu dufunzwe mu kwirinda ikwirakwira ry’ubwandu bwa covid-19.

Ariko, amasaha yo gucuruza yagabanyijwe – tugomba gufunga saa 22h00 zaho, ni ukuvuga saa 21h00 z’ijoro ku isaha yo mu Rwanda no mu Burundi.

Ibi byatangajwe na Perezida Uhuru Kenyatta ku munsi w’ejo ku wa mbere, ubwo yagezaga ijambo ku baturage ku ngamba za leta zo gukomeza guhangana n’icyorezo cya coronavirus.

Image result for Uhuru Kenyatta
perezida uhuru kentatta

Yongereyeho iminsi 60 ku gihe cyari gisanzweho abantu bagomba kuba bageze mu rugo, ariko yongera amasaha yo kuba bari murugo.

Bijyanye n’amasaha mashya yo kuba abantu bari murugo, ubu abaturage bagomba kuba bageze mu ngo zabo saa tanu z’ijoro (aho kuba saa tatu z’ijoro zari zisanzweho), bakahava bitari mbere ya saa kumi za mu gitondo.

Izi mpinduka zatangiye kubahirizwa kuri uyu wa kabiri.

Ibyari byitezwe byo kongera gufungura amashuri ntibyabaye.

Minisitiri w’uburezi yari yategetse abarimu kongera gusubira ku mashuri ku wa mbere, ariko Perezida Kenyatta yavuze ko amashuri yakongera gufungura ari uko gusa umutekano w’abanyeshuri wamaze kwizerwa.

Kenyatta yagize ati: “Niba twaratsinze urugamba rumwe kuri Covid-19, ntabwo turatsinda intambara”.

Kugeza ubu muri Kenya hamaze gutangazwa abantu barenga 38,000 banduye coronavirus, muri bo abarenga 700 imaze kubica.

Hashize ibyumweru umubare w’abandura coronavirus muri Kenya ukomeza kugabanuka, ariko impuguke mu buvuzi zivuga ko ikigero cy’ibipimo kiri hasi.

Utubari two muri Kenya twari twafunzwe mu kwezi kwa gatatu nk’imwe mu ngamba zo kwirinda ikwirakwira ry’ubwandu bwa coronavirus.

naho za ‘restaurants’ zo zari zakomeje gutanga inzoga ku bakiliya kugeza ibyo nabyo bihagaritswe mu kwezi kwa karindwi.

Leave A Reply

Your email address will not be published.