Muhanga: Abantu 22 bafatiwe mu kabari barenze ku mabwiriza yo kwirinda COVID-19

2,667

Mu rwego rwo gukomeza kugenzura iyubahirizwa ry’amabwiriza yo kwirinda ikwirakwira ry’icyorezo cya COVID-19, ku gicamunsi cyo kuri uyu wa mbere tariki ya 12 Mata Polisi y’u Rwanda ikorera mu Karere ka Muhanga, Umurenge wa Mushishiro ku bufatanye n’izindi nzego bafatiye mu kabari ka Gashirabake Christophe w’imyaka 44 abantu 22 barimo banywa inzoga barenze ku mabwiriza yo kwirinda Koronavirusi.

Umuvugizi wa Polisi mu Ntara y’Amajyepfo, Superintendent of Police (SP) Theobald Kanamugire avuga ko aba bantu bafatiwe  mu gasanteri ka Kabadaha mu Kagari ka Munazi, Umurenge wa Mushishiro mu masaha ya saa munani z’amanywa bari mu kabari  banywa inzoga.

Yagize ati “Nk’uko bisanzwe Polisi yari iri mu kazi kayo ka buri munsi ko kugenzura iyubahirizwa ry’amabwiriza yo kwirinda ikwirakwira ry’icyorezo cya COVID-19 nibwo abapolisi bageze ku kabari ka Gashirabake basangamo abantu 22 barimo banywa inzoga begeranye nta n’umwe wambaye agapfukamunwa. Mu mabwiriza ajyanye no kwirinda ikwirakwira rya COVID-19  nta na rimwe bubahirije kuko n’ubusanzwe utubari ntitwemerewe gufungurwa.”

SP Kanamugire avuga ko aba bantu bafashwe baturuka mu mirenge itatu y’Akarere ka Muhanga ariyo; Mushishiro, Rugendabari na Muhanga. Aba bantu bamaze gufatwa baraganirijwe bibutswa uruhare rwabo mu gukumira ikwirakwira rya COVID-19 no kwirinda ingaruka zayo.

Umuvugizi wa Polisi mu  Ntara y’Amajyepfo yibukije abaturage ko nubwo hari serivisi zagiye zikomorerwa bitavuze ko icyorezo cyarangiye, abasaba kutirara ahubwo bakarushaho kubahiriza amabwiriza.

Ati” COVID-19 ntaho yagiye iracyahari, niba mukurikira neza amatangazo ya Minisiteri y’ubuzima ya buri munsi mubona ko muri iyi minsi intara y’Amajyepfo ariho harimo kwiganza ubwandu bwa COVID-19. Ndetse hari imwe mu mirenge yashyizwe mu kato,  turabakangurira kubahiriza amabwiriza yose ajyanye no kwirinda iki cyorezo. Mwirinde utubari, aho muri hose mujye muhana intera, mwirinde amakoraniro, mwambare agapfukamunwa, mugire isuku mukaraba amazi meza n’isabune n’andi mabwiriza yose.”

Abafashwe bahise bajyanwa kuri Sitasiyo ya Polisi ya Mushishiro barigishwa banacibwa amande nk’uko amabwiriza abiteganya.

Leave A Reply

Your email address will not be published.