Nduhungirehe yitabiriye umuhango wo kumurika Urwibutso rwa Jenoside yakorewe Abatutsi i Stockholm

Ubwanditsi
2 Min Read

Minisitiri w’Ububanyi n’Amahanga n’Ubutwererane w’u Rwanda, Amb. Olivier Jean Patrick Nduhungirehe, yifatanyije n’abadipolomate n’abandi bayobozi mu muhango wo kumurika icyimenyetso cy’Urwibutso rwa Jenoside yakorewe Abatutsi mu 1994, cyubatswe mu Mujyi wa Stockholm, muri Suède.

Iki kimenyetso cy’Urwibutso kigamije gukomeza guha icyubahiro Abatutsi bazize Jenoside yakorewe mu Rwanda mu 1994, no gufasha abatuye muri Suède n’abazahagenda gusobanukirwa amateka y’ayo mahano, hagamijwe kwimakaza umuco wo kwibuka no kurwanya ingengabitekerezo ya Jenoside.

Mu ruzinduko rwe, Minisitiri Nduhungirehe yanitabiriye ibiganiro byo ku rwego rwo hejuru byibanze ku ngamba zo gukumira Jenoside, kwimakaza ubumwe n’ubudaheranwa bw’abaturage, ndetse no gushimangira uruhare rw’ubufatanye mpuzamahanga mu kurinda ko ibyaha bya Jenoside byongera kubaho.

Ibi biganiro byatanze umwanya wo kungurana ibitekerezo ku kamaro ko kwibuka amateka, kurwanya ingengabitekerezo ya Jenoside n’ibindi bikorwa byose bishobora kubiba amacakubiri, ndetse no guteza imbere amahame y’ubumwe, ubwiyunge n’ubutabera.

Kumurika iki cyimenyetso cy’Urwibutso i Stockholm ni intambwe ikomeza gushimangira ubufatanye mu kubungabunga amateka ya Jenoside yakorewe Abatutsi, no kugeza ubutumwa bwo kwibuka, kwigira ku mateka no gukumira Jenoside ku batuye hirya no hino ku Isi.

Urwibutso rwa Stockholm ni rwo rwa mbere rwubatswe muri Suède, rukaba urwa kabiri mu bihugu byo mu majyaruguru y’u Burayi, nyuma y’urwatashywe i Vantaa muri Finlande ku wa 4 Kamena 2025. Uru rwibutso rwubatswe mu rwego rwo guha icyubahiro abarenga miliyoni bishwe muri Jenoside yakorewe Abatutsi mu 1994, rukaba ruzajya rukorerwaho mu bikorwa byo kwibuka, kwigisha amateka no gukangurira abantu kurwanya ingengabitekerezo ya Jenoside, urwango, ivangura, kuyipfobya no kuyihakana.

Uru rwibutso rwabatswe  ku bufatanye na Olle Burell, Perezida w’Inama Njyanama y’Umujyi wa Stockholm, binyuze mu ruhare rwe muri Kiliziya ya St Mary Magdalene i Stockholm. Umuhango wo kurutaha witabiriwe n’abayobozi baturutse mu Rwanda na Suède, abahagarariye ibihugu byabo mu bya dipolomasi, abayobozi b’amadini, abarokotse Jenoside yakorewe Abatutsi n’inshuti z’u Rwanda.

Share This Article
Leave a Comment

Leave a Reply

Your email address will not be published. Required fields are marked *