Abandi bantu babiri (2) basanzwemo ubwandu bwa covid-19 mu gihe abagera kuri 5 nabo basezerewe nyuma yo kuyikira.
Ministeri y’ubuzima mu Rwanda imaze gutangaza ko abandi bantu bagera kuri babiri basanzwemo ubwandu bwa coronavirus mu bagera kuri 923 bapimwe none kuwa gatatu taliki ya 15 Mata, nyuma y’abo bantu babiri, ubu umubare w’abamaze kwandura ubwo burwayi bageze kuri 136 ariko muri abo, abagera kuri 54 bamaze kuyikira harimo 5 bakize ndetse baranataha mu masaha 24 ashize.
Ministeri y’ubuzima mu Rwanda yavuze ko abo bantu basanzwemo ubwo bwandu ari abagiye bahura n’abafite covid-19 mu bihe bitandukanye. Ministeri yakomeje isaba Abanyarwanda gukomeza kubahiriza ingamba zafashwe na Leta kugira ngo tubashe guhashya kino cyorezo.
Ministeri y’ubuzima yakomeje isaba abantu bafite amakuru ku wahuye n’uwanduye Coronavirus gutanga amakuru kugira ngo yitabweho n’inzego zibishinzwe.
Iti ‘‘Umuntu wese uhisha cyangwa wanga gutanga amakuru arebana n’abahuye n’umurwayi wa Coronavirus cyangwa agahisha ibimenyetso byabo, aba ashyize ubuzima bwa benshi mu kaga kandi abihanirwa n’amategeko.”
Abarwayi bose bari kuvurirwa ahantu habugenewe kandi bari koroherwa kuko abenshi muri bo nta bimenyetso bya Coronavirus bagaragaza kandi nta n’umwe urembye. Kuva Coronavirus ibonetse bwa mbere mu Mujyi wa Wuhan mu gihugu cu’Ubushinwa mu Ukuboza 2019, abagera kuri 2,051,008 bamaze kuyandura, 507,890 baragikize mu gihe 132 889 kimaze kubahitana. Igihugu cya Leta zunze ubumwe za Amerika nizo ziza ku isonga mu bihugu bimaze kwibasirwa cyane kuko ari nabwo bufite umubare munini w’abamaze gihitanwa na Covid-19. Kugeza ubu, Covid-19 imaze kugera ku migabane yose yo ku isi usibye umugabane wa wa Antarctic. Ku mugabane wa Africa Lesotho n’ibirwa bya Comores nibyo byonyine bitari byageramo kino cyorezo.
