Umukino wa APR FC na Pyramid wongeye uterwa ipine

243
kwibuka31

Imikino izahuza APR FC na Pyramids mu ijonjora ry’ibanze rya CAF Champions League yongeye kwigizwa inyuma, umukino ubanza ushyirwa tariki 1 Ukwakira mu gihe uwo kwishyura uzaba nyuma y’iminsi ine.

Ku ngengabihe y’amarushanwa ya CAF, byari biteganyijwe ko imikino ibanza izakinwa kuva tariki ya 19 kugeza tariki ya 21 Nzeri 2025, mu gihe iyo kwishyura izaba nyuma y’icyumweru kimwe hagati ya tariki ya 26 na 28 Nzeri 2025.

Bigendanye n’ayo matariki, mu Rwanda hazaba hari kubera Shampiyona y’Isi y’Amagare ya 2025, Stade Amahoro izaberamo uyu mukino ndetse n’imihanda iyegereye ikaba ari bimwe mu bizakoreshwa.

Ku wa 15 Kanama, APR FC yatangaje ko “Umukino ubanza wa CAF Champions League uteganyijwe tariki ya 28 Nzeri, naho uwo kwishyura ube tariki ya 4 Ukwakira.”

Yongeyeho iti “Mu gihe gito abakunzi bacu bazamenyeshwa ikibuga kizakinirwaho umukino tuzakira mu rugo.”

Nyuma yo gusanga n’ubundi kuri ayo matariki Stade Amahoro ishobora kutaboneka, Ikipe y’Ingabo yasabye ko imikino yayo yakwigizwa inyuma.

Kuri ubu APR FC izakira Pyramids FC mu mukino ubanza uzaba tariki ya 1 Ukwakira muri Stade Amahoro mu gihe uwo kwishyura uzabera i Cairo mu Misiri tariki ya 5 Ukwakira 2025.

Comments are closed.