Ikipe y’Igihugu y’u Rwanda y’abatarengeje imyaka 17, Amavubi U17, yabonye itike yo kuzakina Igikombe cya Afurika cy’iki cyiciro kizabera muri Maroc mu 2027, nyuma yo gutsinda Ethiopia ibitego 2-1 mu mukino wo guhatanira umwanya wa gatatu mu irushanwa rya CECAFA U17 riri kubera mu Rwanda.
Uyu mukino wabereye kuri Kigali Pele Stadium ku gicamunsi cyo kuri uyu wa Mbere, tariki ya 19 Ukwakira 2026, aho Amavubi U17 yitwaye neza, abona intsinzi yayihesheje kuzasubira mu Gikombe cya Afurika nyuma y’imyaka 15 itacyitabira.
U Rwanda ruheruka gukina iri rushanwa mu 2011, ubwo rwari rwanaryakiriye. Iyi tike nshya iruha amahirwe yo kongera guhatana n’amakipe akomeye yo ku mugabane wa Afurika mu cyiciro cy’abatarengeje imyaka 17.
Amavubi U17 yatangiye umukino igaragaza inyota yo gutsinda, maze ku munota wa gatandatu gusa Shema Heylen Jayeden afungura amazamu, atsinda igitego ku ishoti rikomeye yateye ari inyuma y’urubuga rw’amahina.
Iki gitego cyahaye icyizere abakinnyi b’u Rwanda, bakomeza gusatira izamu rya Ethiopia bashaka kongera ikinyuranyo.
More Read
Ku munota wa 16, Isacc Ndizeye yatsinze igitego cya kabiri cy’Amavubi ku mupira yateye n’umutwe, wari uturutse kuri koruneri. Icyo gitego cyatumye u Rwanda ruyobora umukino n’ibitego 2-0, rushyira igitutu kuri Ethiopia.
Nyuma yo gutsindwa ibitego bibiri, Ethiopia yatangiye kongera imbaraga mu busatirizi, ishaka igitego cyayisubiza mu mukino. Icyakora, mu minota yakurikiyeho, abakinnyi bayo ntibabashije kubyaza umusaruro amahirwe babonye imbere y’izamu ry’u Rwanda.
Ku munota wa 42, Akrem Kemal yatsindiye Ethiopia igitego cyo kwishyura, akoresheje umutwe nyuma y’uko ubwugarizi bw’u Rwanda butabashije gukumira neza umupira wari ugeze imbere y’izamu.
Igice cya mbere cyarangiye Amavubi U17 ayoboye umukino n’ibitego 2-1.
Mu ntangiriro z’igice cya kabiri, umutoza w’Amavubi U17, Jimmy Mulisa, yakoze impinduka, yinjiza mu kibuga Tuyizere Valentin na Ngiriyandemye Emmanuel, basimbura Ujeneza Patrick na Shema Jayden.
Mu minota 15 ya mbere y’iki gice, amakipe yombi yakiniraga cyane hagati mu kibuga, ku buryo ataremaga uburyo bwinshi bukomeye bwo gutsinda ibitego.
Uko iminota yagendaga ishira, Ethiopia yarushijeho kwiharira umupira no gushyira igitutu ku bwugarizi bw’u Rwanda. Ahagana ku munota wa 70, iyi kipe yakomeje gusatira, ibona na za koruneri ebyiri zikurikirana, ariko ntiyabasha kuzibyaza umusaruro.
Mu minota 10 ya nyuma, Ethiopia yashyizemo imbaraga zose ishaka igitego cyo kwishyura, ariko abakinnyi b’inyuma b’Amavubi n’umunyezamu bakomeza kwitwara neza, baburizamo ibitero byayo.
Ku munota wa 86, u Rwanda rwari hafi gutsinda igitego cya gatatu ubwo Ngiriyandemye Emmanuel yateraga ishoti rikomeye rigana mu izamu, ariko umupira ukubita igiti cy’izamu, amahirwe yo kongera ikinyuranyo arayoyoka.
Nubwo Ethiopia yakomeje gushaka igitego cyo kwishyura mu minota ya nyuma, Amavubi U17 yakomeje kurinda neza izamu ryayo kugeza umusifuzi asoje umukino.
Umukino warangiye u Rwanda rutsinze Ethiopia ibitego 2-1, rutsindira itike yo kuzakina Igikombe cya Afurika cy’abatarengeje imyaka 17.
U Rwanda rugiye gusubira mu Gikombe cya Afurika nyuma y’imyaka 15
Iyi ntsinzi isobanuye ko u Rwanda ruzongera kwitabira Igikombe cya Afurika cy’abatarengeje imyaka 17 nyuma y’imyaka 15, kuko ruheruka muri iri rushanwa mu 2011, ubwo ryaberaga mu Rwanda.
Ni inshuro ya kabiri mu mateka Amavubi U17 azaba yitabiriye iri rushanwa, rizahuza amakipe y’ibihugu by’Afurika ahatanira igikombe cy’uyu mwaka w’imikino.
U Rwanda ruzahagararira akarere ka Afurika y’Iburasirazuba n’iyo Hagati (CECAFA) muri iri rushanwa, rukazajyana na Uganda na Somalia. Aya makipe yombi na yo yari agihatanira igikombe cya CECAFA U17 mu mikino yari iri kubera mu Rwanda.
Igikombe cya Afurika cy’abatarengeje imyaka 17 giteganyijwe kubera muri Maroc hagati ya Mata na Gicurasi 2027.
Ku Amavubi U17, iyi ntsinzi ni intambwe ikomeye mu rugendo rwo kongera kwigaragaza ku rwego rw’umugabane, nyuma y’imyaka myinshi atitabira iri rushanwa. U Rwanda rugomba gukomeza kwitegura neza kugira ngo ruzabashe guhangana n’andi makipe no kwerekana ko rushobora guhatanira imyanya myiza muri Afurika.
