Abimukira 44 bifuzaga kujya i Burayi barohamye mu mazi baburirwa irengero.

Abimukira hafi 44 baburiwe irengero igihe ubwato barimo bwibize mu mazi ku nkombe z’amazi muri Sahara y’uburengerazuba kuri iki cyumweru.

Ishyirahamwe ry’abagiraneza rifite icyicaro muri Esupanye, Caminando Fronteras ni ryo ryatangaje iyi nkuru, rivuga kandi ko cumi na babiri bashoboye kurokoka igihe ubwo bwato bwibiraga. Imirambo ine niyo yakuwe mu mazi ariko abandi baburiwe irengero.

Kugeza ubu ntibiramenyekana aho ubwo bwato bwariho bwerekeza, ariko abimukira baturuka muri ako karere bakunze kuba berekeza mu birwa bya Canary muri Esupanye.

Maroke niho abo bimukira baruhukira imbere yo gufata amayira bagana ku mugabane w’iburayi gushakisha ubuzima bwiza.

Kuwa gatanu, ibihugu bya Maroke na Espagne byemeranije ko bigiye kunoza imikoranire no gukorera hamwe ku kibazo cy’abo bimukira.

Ishyirahamwe ry’abagiraneza Caminando Fronteras ryavuze ko muri uyo mwaka wonyine wa 2022, abimukira barenga 4.400 bahasize ubuzima cyangwa baburirwa irengero bariho bagerageza kwinjira muri Espagne.