Umugabo w’imyaka 27 y’amavuko wakoraga akazi ko kurinda umutekano yishwe n’abajura atemwe mu mutwe anaterwa icyuma mu musaya.
Uyu mugabo yarindaga umutekano mu isantere y’ubucuruzi ya Kabadaha mu Kagari ka Bibungo mu Murenge wa Nyamiyaga mu Karere ka Kamonyi.
Ahagana saa munani z’ijoro ku Cyumweru tariki ya 3 Mata 2022, nibwo abajura batemye uyu mugabo wari ushinzwe kurinda umutekano muri aka gasantere ka Kabaduha.
Umunyamabanga Nshingwabikorwa w’Umurenge wa Nyamiyaga, Mudahemuka Jean Damascene, yabwiye IGIHE dukesha iyi nkuru ko uyu mugabo yararaga irondo kuri santere y’ubucuruzi, abajura bamutera ibyuma bahengereye umwe muri bagenzi be bakorana atabonetse.
Yagize ati” bahengereye umwe muri bagenzi be bakorana atabonetse baca muri icyo cyuho cyo kuba hari mugenzi we udahari baramwica.”
Abantu babiri bamaze gufatwa bakekwa kugira uruhare mu rupfu rwa nyakwigendera.
SRC: IGIHE
Comments are closed.