Inzego z’ubuzima muri Kenya zatangaje ko mu bipimo zafashe kuri uyu wa 18 Nyakanga zabonye abagera kuri 688 banduye Covid-19, ibintu byatumye umubare w’abamaze kwandura muri iki gihugu ugera ku 12,750.
Minisiteri y’ubuzima yavuze ko aba bantu 688 babonetse mu bipimo 4522 byafashwe hirya no hino muri iki gihugu bituma umubare w’abamaze gupimwa bose ugera kuri 238 163
Muri aba banduye 425 ni ab’igitsina gabo mu gihe 263 ari abagore, umuto muri bo akaba yari afite amezi arindwi mu gihe umukuru afite 25.
Umubare w’abandura Coronavirus ku munsi muri Kenya warushijeho kwiyongera nyuma y’uko iki gihugu gifashe gahunda yo gufungura ingendo zihuza intara.
Nyuma yo kubona ko abandura bagenda barushaho kwiyongera umunsi ku munsi, Minisitiri w’ubuzima muri iki gihugu Mutahi Kagwe, yibukije abanya-Kenya ko uruhare rwa buri wese rukenewe mu guhashya iki cyorezo.
Yagize ati “Iki cyorezo kiturimo, tugomba kwigomwa kugira ngo duhashye iyi virusi, kora ibyo usabwa nk’umuntu mu kurinda umwana wawe, nyoko, so ndetse n’inshuti zawe mureke turindane. Undinde, nkurinde”
Mu bice bifite umubare munini w’abantu banduye Covid-19 ku isonga haza umurwa mukuru Nairobi umaze kwanduramo abagera kuri 7,298 ugakurikirwa na Mombasa ifite abasaga 1,812 mu gihe Kiambu ifite abagera kuri 725.
