Brazil irateganya gukoresha urukingo rwakorewe mu Bushinwa muri gahunda y’igihugu igamije gukingira coronavirus.
João Doria, guverineri wa leta ya São Paulo, yavuze ko guverinoma yabo yemeje kugura doze miliyoni 46 z’urukingo rwa CoronaVac.
Joao Doria yakomeje avuga ko gahunda yo gukingira ishobora gutangirana n’ukwezi kwa mbere mu 2021, yahita iba umuhate wa mbere ku isi muri ubu buryo wo kurwanya iki cyorezo.
Brazil ni kimwe mu bihugu ku isi byazahajwe cyane na coronavirus.
Abantu miliyoni 5.3 barayanduye, ni igihugu cya gatatu gifite benshi nyuma ya USA n’Ubuhinde kikaba kandi ari icya kabiri inyuma ya USA mu gupfusha benshi, hafi 155,000 bamenyekanye kugeza ubu, nk’uko bivugwa na Kaminuza y’ubushakashatsi ya Johns Hopkins.
Nirwemezwa n’abashinzwe ubuzima muri iki gihugu, urukingo CoronaVac rukorwa na Sinovac Biotech yo mu Bushinwa – ruzaba ari rumwe mu nkingo ebyiri zishyizwe muri gahunda yo gukingira muri Brazil.
Brazil inateganya gutera abantu urukingo ruri gutunganywa na Kaminuza ya Oxford yo mu Bwongereza ifatanyije na kompanyi ikora imiti AstraZeneca.
Bwana Doria mbere yari yarashimagije igeragezwa ry’urukingo rw’Ubushinwa, avuga ko ateganya ko ruterwa bamwe mu baturage ba São Paulo.
Ubu uru rukingo ruri gusuzumwa n’ikigo cy’ubushakashatsi cya leta ya São Paulo
Ku wa mbere, icyo kigo cyavuze ko uru rukingo, ruterwa umuntu ari doze ebyiri, babonye rukora neza mu igeragezwa ku bantu benshi.
Gusa, cyaburiye ko ibyo babonye ari iby’ibanze, ko bakomeje gusuzuma. Ko amakuru arambuye ku buziranenge bwarwo bazayatangaza isuzuma rirangiye.
(Src:BBC)
