Polisi yo muri Kenya yafunze uwahoze ari umudepite muri Tanzania, Godbless Lema, imushinja kwinjira muri iki gihugu mu buryo bunyuranyije n’amategeko.
Mu ijoro ryo kuri iki cyumweru nibwo Lema yafashwe ari mu modoka n’umuryango we, n’umunyamategeko we, bakaba bari bagiye mu buhungiro mu gihugu cya Kenya.
Polisi ya Kenya yafashe aba bantu bageze mu mujyi uri ku ntera ya 45Km uvuye ku mupaka wa Tanzania binjiye muri Kenya,umunyamategeko wa Lema, George Luchiri Wajackoyah, yavuze ko yari ajyanye uyu munyapolitiki ku biro bya UNHCR i Nairobi nkuko ibinyamakuru byabitangaje.
BBC ivuga ko Muri Tanzania hari ibikorwa bimwe byo kwibasira abatavuga rumwe n’ubutegetsi nyuma y’amatora Perezida John Magufuli yatsinzemo Tundu Lisu bari bahanganye.
Godbless Lema yari mu bakuru b’ishyaka CHADEMA ritavuga rumwe n’ubutegetsi bafunzwe bakarekurwa mu cyumweru gishize, bashinjwaga gutegura imyigaragambyo yo gusaba ko amatora asubirwamo.
