Ikipe ya Real Madrid yaraye yegukanye igikombe nyuma yo gutsinda ya Villareal
Ku mugoroba wo kuri uyu wa kane nibwo ikipe ya Real Madrid yegukanye igikombe cya championnat nyuma yo gutsinda ikipe ya Villareal ibitego bibiri kuri kimwe, mu gihe mukeba wayo FC Barcelona yatsindwaga n’ikipe ya Osasuna.
Wari umukino wo ku munsi wa 37, ikipe ya real Madrid yagombaga kwakira ikipe ya Villareal. Byasabye iminota 28 gusa kugira ngo ikipe ya Real itangire ihumurirwe n’igikombe, kuko kuri uwo munota Karim Benzema yari amaze gufungura amazamu, atsindira igitego cya mbere ikipe ye ya Real madrid.
Ikipe ya Osasuna yagerageje gusatira ariko bikomeza kwanga kuko ba rutahizamu bayo byabagoye kumena urukuta rwari rubatswe na ba myugariro ba Real bari bayobowe na Ramos.
Real Madrid yongeye ishyiramo ikindi gitego kuri penalti yashyizwemo na none na Karim Benzema nyuma yuko iyi bari bateye bwa mbere umusifuzi ayanga.
Ikipe ya Real Madrid itwaye igikombe cya 34 ku manota 86 mu gihe Barcelona yo ifite amanota 79. Ni igikombe itwaye nyuma y’imyaka 3 kuko yagiherukaga mu mwaka w’imikino wa 2016-2017 ubwo yatozagwa na Zinedane Zidane, akaba ari nawe uyihesheje igikombe cya Laliga ku yindi nshuro.
