Umugabo ukekwaho uruhare muri Jenoside yakorewe Abatutsi yafatiwe muri Canada

Polisi yo muri Canada izwi nka Royal Canadian Mounted Police (RCMP), yataye muri yombi umugabo w’imyaka 68 wari umaze imyaka igera kuri 30 aba muri icyo gihugu akoresheje imyirondoro bivugwa ko itari iye.

Uyu mugabo wari atuye mu Mujyi wa Ottawa, yashakishwaga n’u Rwanda hashingiwe ku mpapuro mpuzamahanga zo kumuta muri yombi akekwaho uruhare muri Jenoside yakorewe Abatutsi mu 1994.

Nk’uko byatangajwe na CBC News, RCMP yavuze ko yatawe muri yombi ku wa Mbere, nyuma yo kugera muri Canada avuye mu mahanga. Nyuma yo kumufata, abapolisi banasatse urugo rwe, aho bashakishaga inyandiko, ibikoresho by’ikoranabuhanga n’ibindi bimenyetso bishobora kwifashishwa mu iperereza.

Igihe.com dukesha iyi nkuru ivuga ko uyu mugabo arakurikiranyweho ibyaha 16 bijyanye n’amategeko ya Canada agenga abinjira n’abasohoka. Polisi ya Canada ntiyashyize hanze urutonde rurambuye rw’ibyo byaha, ahubwo yasobanuye ko bifitanye isano n’iperereza ku ikoreshwa ry’imyirondoro itari yo n’ibindi byaha bijyanye n’abinjira n’abasohoka.

RCMP yatangaje ko iperereza kuri uyu mugabo ryatangiye mu Ukuboza 2021, nyuma y’uko inzego zayo zibonye amakuru avuga ko hari umuntu wari umaze igihe kinini aba muri Canada akoresheje imyirondoro y’impimbano. Ayo makuru yanagaragazaga ko uwo muntu yashakishwaga hashingiwe ku mpapuro mpuzamahanga zo kumuta muri yombi zari zaratanzwe n’inzego z’u Rwanda.

More Read

Ngororero: Umuganga akekwaho gusambanya ku gahato umurwayi ugiye kwikuza iryinyo

Umubano wacu ni amahitamo, si impanuka” – U Bushinwa n’u Rwanda byizihije imyaka 55 y’ubufatanye

Kamonyi: Umusore w’imyaka 23 yishwe atemaguwe

Ababyeyi b’abana bivugwa ko bakopeye bazindukiye kuri NESA gusaba ibisobanuro

Mu itangazo ryashyizwe hanze na RCMP, iyi Polisi yavuze ko izo mpapuro zo kumuta muri yombi zari zishingiye ku birego bifitanye isano n’uruhare uwo mugabo akekwaho muri Jenoside yakorewe Abatutsi mu 1994.

RCMP yavuze ko iri perereza ryasabye imbaraga nyinshi, igihe kinini n’ubufatanye bw’inzego zitandukanye, haba muri Canada ndetse no ku rwego mpuzamahanga.

Ifatwa ry’uyu mugabo rije mu gihe hakomeje ibikorwa byo gushakisha no gukurikirana abantu bakekwaho kugira uruhare muri Jenoside yakorewe Abatutsi, cyane cyane ababa bari mu mahanga. Hari benshi bakekwaho uruhare muri Jenoside bamaze imyaka myinshi bihishahisha mu bihugu bitandukanye, bamwe bakaba bashinjwa gukoresha imyirondoro itari iyabo kugira ngo badakurikiranwa n’ubutabera.

More Read

Ruvuyanga wamenyekanye mu rubuga rw’imikino yasezeye muri RBA

Nyagatare: Imvura yasenye ishuri n’inzu z’abaturage

Urukiko rwahaye umugisha amasezerano ya Fabrice Shema Ngoga n’Ubushinjacyaha

Ubwoba ni bwose muri Turukiya nyuma y’amasasu yarasiwe hafi y’ishuri agakomerekeramo 11.